Universis et singulis praesentes literas inspecturis, praesertim tamen patribus abbatibus, prioribus, abbatissis, priorissis, cellerariis, bursariis et officiariis cisterciensis ordinis nec non omnibus, quos tangit hoc negotium. Frater Georgius, abbas monasterii sanctae crucis in Austria ejusdem ordinis, pataviensis dyocesis salutem in domino, sinceram caritatem. Noveritis, nos pridie domini et capituli generalis cisterciensis literas in pergameno conscriptas et appendenti sigillo roboratas et alias sanas et integras reverentia qua decuit recepisse cum aliis certis missivis et informationibus pro subsidio ordinis caritativo a monasteriis ordinis utriusque sexus in partibus Austriae, Stiriae, Carinthiae et circum vicinis locis fiendo. Quia commissionem illibatam in propria forma una cum missiva partem per praesentem latius dirigimus, quibus perlectis et intellectis causa brevitatis, quum non delectamur in longis epistolis, hortamur, rogamus et monemus et sub eisdem formidabilibus ordinis poenis praecipimus venerabilibus patribus et cuilibet vestrum utriusque sexus, ut infra quindena ab insinuatione praesentium summam et quottam vobis a nobis impositam nobis ad monasterium nostrum sanctae crucis transmittere||
curetis aut latori praesentium in instante solvere non postergetis. Tum propter viae distantiam et sumptibus (sic) procedendi tum propter terminum brevem in commissione praeposita minime negligendum, et ut id clarius pateat caritatibus vestris vobis v. p. in nova civitate ad sanctam trinitatem impositi sunt quatuor fl. reynenses, vobis v. p. in Novomonte duodecim fl. R., vobis v. p. in Runa quatuordecim fl. R., vobis v. p. in Sitich decem fl. R., vobis v. p. in Landstras quatuor fl. R., vobis v. p. in Victoria quindecim fl. R., vobis v. p. in Campo liliorum quindecim fl. R., vobis v. p. in Valle Dei quatuor fl. R., vobis v. p. in Paumgarttenberg duodecim fl. R., vobis v. p. in Hylaria duodecim fl. R., vobis v. p. Altovado sex fl. R., vobis v. p. in Zwettla duodecim fl. R.; monasteriis vero monialium in Slierbach quatuor fl. R., ad sanctum Bernhardum quatuor fl. R., ad Spiritum sanctum in Ipsa quatuor fl. R., ad sanctum Nicolaum in Wienna quatuor fl. R. Summa a nobis imposita et si in modico excedit summa centum fl. R. non sit vobis cara et onerosa, quia etiam (?) ut bajulus iterato ad capitulum nostrum generale habeat sumptos . . . se quoque expediat quittantiis hinc inde pro partibus nostris. Igitur faciemus in praemissis, uti ad plenum de vobis v. p. confidimus, in quibus et ordini rem gratam et vobis opus salutare facietis. Nobis quoque per omnia complacetis. Nos itaque commissionis praedictae commissarius favens huic salubri rei, insuper praemissis de causis permotus superiorum mandatis ut tenemur, obedire et obsequi cupiens, vos omnes et singulos venerabiles in Christo patres abbates et abbatissas et quemlibet vestrum, quibus aut cui praesentes nostrae literae unacum aliis fuerint exhibitae, aut in quorum monasteriis vel habitationibus legitime fuerint initiatae, ea qua decet reverentia requirimus et debita instantia monemus ac in virtute salutaris obedientiae districte praecipiendo mandamus, quatenus infra praetactam quindenam, quam vobis pro termino peremptorio assignamus effectualiter summas impositas solvatis, alioquin omnes singulosque, qui hujusmodi monitionis et mandati nostri, ymo verius totius ordinis et capituli generalis contemptores exstiterint, vel eum qui contemptor exstiterit, ex tunc prout ex nunc et ex nunc prout ex tunc excommunicamus in dei nomine in his scriptis||
ac excommunicatum et ab omnibus divinis et extra diligentius evitandum publice denuntiamus, absolutionem vero omnium et singulorum, qui se in praemissis negligentius reddiderint et ob id censuras inciderint, domino Cistercii dumtaxat aut Capitulo generali in solidum scriptis praesentibus reservamus, mandantes nihilominus omnibus et singulis prioribus, priorissis, subprioribus, subpriorissis, cellerariis, bursariis, officiariis et conventualibus monasteriorum in Austria, Stiria, Carinthia et circumvicinis utriusque sexus sub eisdem formidabilibus in commissione et excommunicationis latae sententiae poenis caeterisque abbates, abbatissas ad obediendum mandatis nostris imo verius superioribus nostris ac capitulo generali diligentius inducant requisiti . . . hujusmodi rerum processum fideliter insinuent. Contradictores post lapsum tertium in divinis et extra ubique devitent, donec aliud a nobis aut a superioribus nostris habuerint in mandatis. Caeterum praesentium exhibitorem, harum videlicet literarum capituli generalis et mearum bajulum omnibus et singulis dominis ac prioribus ac personis ordinis sinceriter in domino recommendamus, mandantes vobis dominis abbatibus et abbatissis in praemissis, quatenus eidem in viae et vitae necessariis ac expensis congruentibus, prout ratio secundum locorum distantiam dictaverit, providere curetis, certificantes nos per eundem de ipsius diligentia et vestra bona voluntate in omnibus antedictis sub poenis et censuris superius subministratis. In quorum omnium et singulorum fidem, robur et testimonium praesentibus sigillum nostrum abbatiale duximus appendendum. Datum in monasterio sanctae crucis feria tertia Clementis papae et martyris, anno domini millesimo, quadringentesimo septuagesimo tertio.

Source Fulltext: Zisterzienser-Chronik 11 (1899) S. 368-370