Frater Johannes abbas Cistercii . . . Venerabilibus et in Christo nobis carissimis coabbatibus nostris monasteriorum de Pelisio et de (leerer Raum) salutem et procurare ordinis incrementa. Juxta oneris desuper nobis commissi dispensationem libenter ea annuimus quae honestis utilitatibus monasteriorum ordinis inservire nuntiantur. Petitio itaque venerabilis et in Christo nobis carissimi coabbatis nostri de Santa cruce in Austria continebat, monasterium ipsum maxime indigere lacubus juxta monasterium ad conservationem piscium, quos construere non possunt, nisi vendant quandam villam suam jam quasi per XXX annos desolatam, nuncupatam Weynarn cum suis pertinentiis sitam in Hungaria in metis tamen theutoniae, requirens consensum nostrum juxta formam ordinis super venditionem hujusmodi villae cum suis dictis pertinentiis. Quocirca laudabilem ordinis consuetudinem in consimilibus in benedictina fundatam imitantes vobis, de quorum prudentia, discretione, comitate et rectitudine confidimus tenore praesentium committentes mandamus, quatenus vos super praemissis debite informetis et si inveneritis, venditionem seu alienationem dictae domus fore et esse eidem monasterio utilem ac debitum pretium receptum seu recipiendum in alias utilitates ejusdem monasterii commutandum, eidem venditioni seu alienationi nostro et ordinis nomine consentiatis, et easdem, cum ut praemittitur, factae fuerint, approbetis et confirmetis in plenaria ordinis potestate. Datum Cistercii cum appensione sigilli nostri, VI die mensis augusti anno domini millesimo quadringentesimo octuagesimo primo.

Source Fulltext: Zisterzienser-Chronik 12 (1900) S. 311