Frater Johannes abbas Cistercii ... in Christo nobis carissimo coabbati nostro monasterii de Sancta Cruce salutem et ex perceptis gratiarum muneribus ad majora profectum. Licet non sit consuetudinis ordinis committere potestatem rehabilitandi, sed illa solis capitulo generali et abbati cisterciensi servari soleat, nihilominus pro nostra speciali benevolentia ad filios ordinis generose rationis vestrae consideratis viarum discriminibus et contraviarum periculis vobis, de cujus discretione et multis virtutibus confidimus tenore praesentium committentes damus auctoritatem et plenum posse rehabilitandi ad omnes gradus, voces, actus et dignitates ordinis octo personas, cujusvis sexus existant, professos in aliquo monasteriorum nostrorum per aliam commissionem nostram prudentiae vestrae commissorum et hoc ad requisitionem abbatum seu abbatissarum ipsorum et non aliter expediendi, quam eis super tanta gratia litteras vestras patentes. Datum Cistercii sub appensione sigilli nostri VII die mensis augusti anno domini millesimo quadringentesimo octuagesimo primo.

Source Fulltext: Zisterzienser-Chronik 12 (1900) S. 344