Innocentius episcopus seruus seruorum dei. Dilectis filiis.. Preposito et Capitulo ecclesie sancti Georgii in Herzogenburc ordinis Augustini (sic) Patauiensis diocesis. Salutem et apostolicam benedictionem. Cum a nobis petitur quod iustum est et honestum tam uigor equitatis quam ordo exigit rationis ut id per sollicitudinem officii nostri ad debitum perducatur effectum. Eapropter dilecti in domino filii uestris iustis postulationibus grato concurrentes assensu personas uestras et locum in quo diuino estis obsequio mancipati cum omnibus bonis que inpresentiarum rationabiliter possidetis, aut in futurum iustis modis prestante domino poteritis adipisci sub beati Petri et nostra protectione suscipimus. Specialiter autem domos uestras possessiones ac alia bona uestra sicut ea omnia iuste ac pacifice possidetis uobis ac per uos ecclesie uestre auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere uel ei ausu temerario contraire. Si quis autem hoc attemptare presumpserit indignationem omnipotentis dei. et beatorum Petri et Pauli apostolorum eius se nouerit incursurum. Datum Lugduni VIII. Kal. Maj. Pontificatus nostri Anno Sexto.

Source Fulltext: FAIGL, Herzogenburg (Wien 1886) S. 2