Ich Weigant Eysnpevtel von Chogel gich vnd tvn chvnt allen levten, di disen brief sehent, oder horent lesen, daz gvet, daz mich datz Chveffarn von meinem Ochheim hern hertneit, dem Pischolf von Gvrka, zwen Mvtt Waytzes, zwaymin dreyzk pfennig, aynlef hvener anerstarben ist, daz ich daz selb gvet Wernharten von Gotzinsdorf han ze chauffen gegeben vmb zweynzk pfund pfennig der gewonlichen wienner Mvnizz, mit meiner havsvrowen vron Tveten vnd aller meiner erben gveten willen, vnd han avch di Aygenschaft gegeben ledichleich dem gveten Sant Jorgen hintz Hertzogenbvrch also daz Wernhart vnd sein erben daz selben gvet zerechtem pvrchrecht von dem selben gotshavs haben, alli iar an Sant Nycolawestag zechn pfennig zedienen avf Sant Nycolawes Alter in dem selben gotshavs, vnd daz ich Weygant Eysnpeutel des vorbenanten gvetes, des gotshavses vnd Wernhartes vnd avch seiner erben nach des landes recht, rechter scherm bin, vnd mein havsvrowe vnd meinev chint vnd loben daz mit vnsern triwen. Daz dev red dem gotshavs datz Hertzogenbvrch vnd Wernharten vnd seiner havsvrowen vnd seinen erben stet vnd vnverchert beleib, gib ich in disen brief, versigelten vnd bestetten mit mein selbes Insigel vnd avch mit dem meines prveder, hern Chvnrates vnd mit dem meins Aydems hern Philippes von Entzensdorf vnd mit dem meins Ochheims Ulreichs von Gvetenprvnn Insigel. Der sachh sint gezeug her Chvnrat von Arnsteyn, her Fridereich vnd Gvndachher, di prveder ped von Retelnperg, her Hainreich der Reichholtsperger, her Seifrit der Lochler, her Herbort von Wielanstal, her Havchh der Watensteyner, Levtold von Aynod, Chvnrat Retzinger, havch von Wagreyn, Volchwin vnd Alber von Gotzinsdorf, Meinhart von Poting, vnd Fridreich von Nvzdorf, vnd ander vrvm levt, den dev red chvnt vnd gewizzen ist. Daz ist ergangen nach Christes gebvrt vber Tavsent lar vber drevhvndert lar, darnach indem dritten iar. Datz Hertzogenbvrch an dem heiligen Percht tag.

Source Fulltext: FAIGL, Herzogenburg (Wien 1886) S. 25-26