Ich Hertneid von Sachsengange, vnd ich Margret sein hausvrowe. hern Gvndackers tohter von Terenberch dem got gnade, wir veriehen vnd tvn chvnt allen den die disen prief lesent oder horent lesen, die nv lebent vnd hernah chvnftich sint. Daz wir mit vnser erben gvtem willen vnd gvnst vnd mit meins gesweien willen vnd gvnst Nychlas von Terenberch vnd mit verdahtem mvte. vnd mit gesamter hant zv der zeit do wir iz wol getvn mohten. verchauft haben vnsers rehten Aigens. vnsern Hof.19 der da leit da ze Etzleinperge. mit alle dev vnd dar zv gehorent ze holtz ze velde vnd ze dorf iz sei gestift oder vngestift versvcht oder vnversvcht, swie so iz genant ist. vnd Sechzich phennige geltes in den hof, den selben hof haben wir geben mit allem dem nvtz vnd reht als wir in in Aigens gewer her praht haben, vmbe Drev vnd Sibinzich phvnt wienner phenninge der wir reht vnd redlichen gewert sein. dem erbaern manne hern vlrichen von Terenperch. und allen seinen chinden ledichlichen vnd vreilichen ze haben vnd allen irn frumen damit zeschaffen verchavffen versetzen vnd geben swem sie wellen an allen irresal. vnd darvber dvrch pezzer sicherhait so setzen wir vns. ich Hertneit von Sachsengange, vnd ich Margret sein havsvrowe. vnd ich Nychla von Terenberch. vnverschaidenlichen. dem vorgesprochen hern vlrichen von Terenberch. vnsern prvder vnd allen seinen chinden. vber den vorgenanten Hof da ze Etzleinsperge, vnd vber alles daz darzv gehoret ze velde vnd ze dorf. swie so daz genant ist. vnd vber die Sechzich phenninge geltes ze rehtem scherme fvr alle Ansprache, als Aigens reht ist vnd des landes gewonhait ze Osterreiche. vnd avch also mit auz genomner rede. ob sie vmb daz vorgenant gvt indert werdent angesprochen. swelhen schaden sie der selben ansprache nement den svln wir in mit gvtem willen allen ablegen, vnd geben in dar vber disen prief ze ainem sihtigen vrchvnde vnd ze ainem offen gezevge. vnd ze ainer ewigen vestnvnge diser sache versigilten mit vnsern Insigiln. vnd mit hern Ludweiges Insigil von Zelkingen. vnd mit hern Levpoldes Insigil von Sachsengange. die diser sache gezevg sint, mit ir Insigiln. vnd sint avch des gezevg. der Chamrer her Chalhoh von Eberstorf. her Ortolf von Atzenprvcken. vnd ander frvme levte genvch den dise sachc wol chvnt ist. Diser prief ist geben ze Wienne do von Christes gebvrt waren ergangen. Drevzehen Hvndert lar. In dem dritten lare darnah. An sand Policharpen tage.

Source Fulltext: FAIGL, Herzogenburg (Wien 1886) S. 27-28