Ich Haidenreich von Tya vergich vnd tv^on chunt an disem Brief allen den die in sechent oder horent lesen, die nu lebent oder her nach chunftig sint, daz ich an den czehentn ze Prukk ze Edelcz ze Stech ze Stochsen ze Holnpach ze Puech ze Pirichaech datz zwain Harden ze Netraz vnd ze Lerch die des Gotshauss des heiligen Herren santt Georgen ze Hertzogenburch sind, dhain recht nicht en han, weder chlaines noch grozz, nv^or daz mir der Erber vnd mein genaediger Herre Brobst Wolfger die vorgenantn zehent hevr lazzen hat vnd ich die von im auch bestanden han. vnd hat auch er mir besunderlich die genad getan welichs jars er mir oder sein nachchomen den Traydzehent lazzent, daz ich in dann gebn schol fur iren chlainen zehent ainen chalbspauch oder zwen vnd dreyzzk phenning dafür, zwelif Ches oder vier vnd zwainzich phenning in dem Herbst ein Swein, oder ein phunt pfenning alls gemainer wienner, zwelif Gens, vnd vier vnd zwainzk Hùener. Wann aber daz ist daz mir der vorgenant Herr Brobst Wolfger oder sein verbesaer oder ir Nachchomen den vorbenantn zehent nicht lazzen wolten, so schol ich sev dar an weder an chlainem nach an grozzem nindert hindern nach unfuedern, nu^or daz ich in dar zu dienen schol, wie si ir zehent aller pestt gelazzen mùgen, wann ich noch mein Erben daran dhein recht nicht haben, daz lob ich in alles staet vnd vnzeprochen ze halten mit meinen triwen an aydes stat. Vnd daz in daz von mir vnd von meinen Erben hinfur ewichleich staet vnd vnzebrochen beleib, gib ich vorgenanter Haidenreich, dar vber den Brief besigelten mit meinem anhangundem Insigel. ze einem waren v^orchund vnd gezeug diser sachhe, des ist auch gezeug der Erber beschaiden man Paldwein der Swarzinger mit seinem anhangundem Insigel. Vnd der Brief ist gegeben nach Christi gepurd. Tausent jar drehundert jar dar nach in dem sechsten jar an sand V^olreichs tag.

Source Fulltext: FAIGL, Herzogenburg (Wien 1886) S. 29-30