Ich Hartunch von gevell vergih vnd tuen chunt alle den die disen prieff an sehent oder lesen horent die nv lebent oder her nach chvnftig sind, das ich mit verdahtem mv^et vnd mit gv^etem willen meiner hovsvrowen vron Geiseln vnd aller meiner erben han ze loesen vnd ze chovffen gegeben meinem herren probst wolfkern vnd ovch alle der samnvng sand jorgen gotshovsses ze Hertzogenburch allen den nvtz vnd dienst, den ich gehabt han von vier weingarten, die gelegen sind ze Tyemendorf pei dem Champ mit allem ovch dem reht, vnd ich sev vnd mein vordern ze rehtem pverchreht von dem selben gotshovsse gehabt haben, vnd han in ovch das selbe gvet gegeben vmb nevn phvnt phenning wienner mvniz, der ich schon vnd gentzlichen gewert pin, vnd des gvetes schol ich des vor genanten gotshovsses scherm vnd gewer sein nach landes sit vnd gewonhait in O^esterriche. Dar zv ze einer westetung vnd diser sach zevich gib ich den prieff versigelt mit meinen insigel. Des sind zevich her Chvnrat von Arenstain, her Gvndacher von Retelnperg her Ott von Weissenwerch, her Ott von Gravenwerd, her Herword von Egendorf, her Herwort von wielantstal, alram von dem perig, Hainrich von Reicholsperig, alber von Gozesdorf, Leupolt der Smitzperger vnd ander frvm levt genvch, den dev red vnd dev sach chunt ist. Der prieff ist gegeben, do von Christes gepvrd warn ergangen Tavsent Jar, drevhunddert jar darnach in dem sibenten jar an sand Jacobs tag.

Source Fulltext: FAIGL, Herzogenburg (Wien 1886) S. 31-32