Ich Ott, weilen Probst ze Mawer vnd mein havsvraw vro Mehthild vergehen vnd tuen chvnt alle den die disen prief an sehent, oder lesen horent, die nv lebent oder her nach chvnftig sind, Das wier des Cehents ze Oberndorf den wier haben von der Samnvng des Gotshavss ze Hertzogenburch, des seu cryech hintz vns heten vnd vns dhains rehts dar an niht iahen vntz wier seu vnsers rehts dar an ermanten noch ze haben gvnnen wolten, nv hab wier probst Trosten vnd avch allev dev Samnvng dez vorgenanten gotshavss ze den zeiten, an dem Cehent ermant vnsers rehten vnd jehen avch des vorgenanten Cehents ze Oberndorf Ich Ott vnd mein havsvraw Mehthild nicht lenger ze haben danne czv vnserr payder tagen, mit allem nvtz getraids vnd weins, vnd wann wier nimer sein, so ist der Cehent des Gotshavss fuerpas ledichleich mit allem reht vnd schulle wier in da van alle iar dienen aynen Mvtt chorns vnd aynen Mvtt habern ierer chasten mazze. vnd schullen sev des wern vor sand Michels tag vnd sehtzehen Emmer weins, gemainer mazz vnd schullen des weren vor aller Hailigen tag, vnd den dienst schullen wier in ge antwurten in ier Gotshavss ze Hertzogenburch an alle ier mve. vnd wann wier der tag nicht wehalten, vnd den dienst versavmen ze geben, so sei wier gevallen van allem vnserm reht an dem Cehent sam ob wier toet wern vnd ist der Cehent fuerpas dem Gotshavss vnd der Samnvng ledich mit allem reht des vorgenanten Gotshavss ze Hertzogenburch. Das dev red stet weleib vnd dhainer vnserr erben an dem vorgenanten Cehent rehts jach oder dhainen cryech dem Gotshavss daran tue geb wier probst Trosten ze den zeiten vnd der Samnvng den prief versigelt vnd westetet mit der Erbern herren Insigel. hern Levtoldes von Chvnring, vnd hern Chvnrats von Arenstayn ze einem vrchvnd. Des sind zevich her Gvndakcher von Retelnperg, her Ott von weissenwerch, her alber von Gozesdorf her wernhart von Nvzdorf Levtold von aynod Chvnrat der Ressinger Leupolt der Smitsperger, vnd anderr frvm levt genvch, den dev red wol chvnt ist. Der prief ist gegeben da van Crists gepurd warn ergangen Tavsent lar, drev hundert lar dar nach in dem aynleften Iar.

Source Fulltext: FAIGL, Herzogenburg (Wien 1886) S. 42-43