Ich Johannes von Mukkaraw vergih vnd tuen chunt alle den die disen Prief an sehent oder lesen horent die nu lebent oder her nach chunftig sind, Das ich alle jar dienen schol meinem herren dem Probst Sand Jorgen Gotshauss ze Hertzogenburch zwen Mutt Chorns Tulner mass. hintz Tuln oder hintz chunesteten an der zwaier stet aynev. wo man mier hingepeutet, von meinem hof ze werdarn den ich van dem vorgenanten Gotshaus han ze rehtem purchreht vnd schol den vorgenanten getraid alle jar dienen vor Sand Michelstag Ich schol auch alle jar dem Gotshaus dienen an Sand Michelstag cehen pfenning vnd drey schilling wienner gemainer munizz van anderm aygen hofsteten paumgarten vnd Ekchern das in den hof ze werdarn gehort Ich schol auch meinem herren dem Probst des vorgenanten Gotshauss geben mal vnd nahtsell vnd allen seins Gotshauss poten guetleichen warten vnd enphahen vnd in geben wes ich gehaben magh wann sev zv mier choment. wann ich des dienst niht laist vnd wenant vnd geschriben stet so pin ich dem Gotshauss vnd meinem herren dem Probst wandel schuldig weliben nach purchrechts reht vnd landes gewonhait. Dar vber gehoret ayn weingart zv dem hof ze werdarn wann ich den wil verchauffen so schol ich darauf stiften zwainzig pfenning gvltes die man alle jar da van dien dem Gotshaus an Sand Michels tag vber den dienst der vor wenant vnd gescriben ist. Ich schol auch van dem hof niht verchummern noch verchauffen an meins herren des Probst willen vnd wissen. Das disev red stet weleib gib Ich Johannes disen prief meinem herren dem Probst vnd der Samnvng des Gotshauss ze einem vrchund vnd westetigung versigelt vnd westetet mit des Erbern Reytter hern Hainreichs des Cinken Insigel vnd mit meins prueder winthers Insigel. Des sind zevich her Ott von Celking her Chunrat von Arnstayn her Gvndakcher von Retelnperg her herwort von wielantstal her alber von Gozesdorf Leupolt der Smitzperger Otacher der Matseer Levtold der Schreiber von Zayssenmauwer vnd anderr frvm levt genuch den dev sach vnd red wol chunt ist. Der prief ist gegeben da van Cristes gepurd ergangen warn Tausent jar drev hvndert jar dar nach in dem zwelftem jar an Sand Margreten tag ze Hertzogenburch.

Source Fulltext: FAIGL, Herzogenburg (Wien 1886) S. 45-46