Ich Walther pharrer in dem Entzespach, weylen des Drvhsetzen Schreiber vergib vnd tuen chvnt allen die disen prief an sehent oder lesen horent, die nv lebent oder her nach chvnftig sind das der criech, der zwischen mier vnd meinem herren Probst Trosten vnd der Samnvng Sand Jorgen Gotshavss ze Hertzogenburch, was vmb den hof ze Gravenwerd den ich von ieren genaden han den ich in nicht verdient het als ich ze recht scholt also mit meinem gveten willen vnd nach frvmer levt rat gesatzet vnd geendet ist das ich den selben hof schol legen pevleich ze veld vnd ze dorf dem Gotshavss vnd wer des Gotshavss Probst vnd phleger ist dem schol ich da geben alle jar ze dryn seinen Tayding, mal vnd nahtsell vnd allen des Gotshavss poten die zv mier da chomet mit tauen des ich gehaben mag. Ich schol avch alles des das zv dem hof gehört nicht verchvmern noch verchavffen. Ich schol avch dem Gotshavss alle jar von dem hof dienen sehttzehen Mvtt getraydes des schol sein zwen Mvtt waytz. Sehs Mvtt chorns. zwen Mvtt Gersten, sehs Mvtt habern gemainer Grafenwerder Mass. dev giwich vnd gengych ist. an sand Michelstag fuer einen igleychen Mvtt dreysich Mettzen dev der vorgenanten mass. Wann ich versavm ainen der dienst vnd der setze, vnd vor gescriben sind vnd den tag sand Mychels so pin ich gevallen von allem dem reht des ich an dem hof han sam ob ich toet wer. vnd ist der hof des Gotshavss fuerpas mit allem reht ledichleich vnd gentzlichen an allen cryech. Das dev red stet vnd vnzewrochen fuerpas von mier weleib gib ich walther der vorgenant dem Gotshavss den prief versigelt vnd westetet ze einem vrchvnd mit meinem Insigel vnd mit der erbern herren Insigel die her nach gescriben sind, dye pey der red warn vnd den is wol chvnt ist. hern chvnrats Insigel des Tyernstainer. hern Otten von weissenwerch. hern Otten von Gravenwerd. hern Herworts des Egendorfer. hern wernharts des Drvhsetzen von Uzesdorf. Chalhochs des hechleyn. Des sind zevch. her Chvnrat von Arnstain. her Gvndacher von Retelnperg. her alber von Gozesdorf. Hainreich der Reichholsperger. Leb von vrevntzhavsen, Leupolt der Smytsperger, Eberhart der Rihter ze Hertzogenburch, Hainreich der Strayppler, walther von Haytzendorf. Ortolf der Hayder vnd anderr frvmer levt genvch den dev red vnd dev sach wol chvnt ist. Der prief ist gegeben do von Cristes gepurd warn ergangen Tavsen Jar drev hvndert Jar dar nach in dem aynleften Jar des Mentags in der drytten vastwochen in dem Gotshavss ze Hertzogenburch.

Source Fulltext: FAIGL, Herzogenburg (Wien 1886) S. 38-39