Ich Seifrit der Schench von Wolfsperg vergich vnd tuen chvnt alle den die disen prief an sehnt oder lesen horent die nv lebent oder her nach chvnftig sind, das ich mit verdahtem mvet vnd mit gvetem willen meiner havsvrowen vron Gerdravten vnd meiner prueder Dyetmars vnd Dverings vnd aller meiner erben han ze chavffen gegeben vron Elspeten hern haydenreichs witiben von pvrchstal vnd allen ieren erben oder wem sie is geben will das gvet fvnf schilling vnd zwelif pfenning wienner mvniz die man alle jar an sand Mychelstag dient die gelegen sind auf reutekchern da man die pfenning die vor gescriben sind an dem vor genanten tag dient von den selben ekchern vnd sind zwischen Retelnperg vnd pfeffing gelegen, vnd han ier der vor genanten vrawen vron Elspeten das gvet gegeben ze rehtem aygen also ich is vnd mein vordern haben gehabt in gewalt vnd gewer, vnd schol auch ich des gvetes ier gewer vnd scherm sein nach landes sit vnd gewonhait in Oesterreich vnd wo ich ier des scherms abging, was si des schaden nem den schaden schol si haben auf alle dem vnd ich han in dem land vntz ier schad vnd mve gentzlichen werd ab getan vnd gepessert, den si davon nimt vnd den scherm schullen mein havsvraw vnd mein prueder die vorgenanten vnd alle vnser erben mit samp mier laisten vnd avch nach meinem toet schullen sev ier den scherm laisten. Das dev red stet weleib gib ich der vrawen den prief ze einem vrchvnd versigelt mit mein insigel vnd mit meinen vor genanten prueder insigel. Des sind gezevich her Chvnrat von Arnstayn her Gvndachcher von Retelnperg, her Ott von weissenwerch, her Herwort von wielantstal, her Alber von Gozesdorf, Leupolt der Smitzperger vnd anderr frvm levt genvch den dev red wol chvnt ist. Der prief ist gegeben, do von Cristes gepurd warn ergangen Tausent jar drevhvndert jar dar nach in dem ainleften jar an vnser vrawen tag ze der Lychtmiss. ze Hertzogenburch.

Source Fulltext: FAIGL, Herzogenburg (Wien 1886) S. 36-37