Wier Swester Gerdravt von waldekke priorinn ze den zeiten der vrawen Chloster ze Tuln prediger Ordens vnd avch alle dev Samnvng des selben Gotshavss vergehen vnd tuen chvnt alle den die disen prief an sehent oder lesen horent die nv lebent oder her nach chvnftig sind. Das wier der Erbern Chorherren Samnvng Sand Jorgen Gotshavss ze Hertzogenburch vnd wer des Gotshavss Probst vnd phleger ist alle Jar dienen schullen an Sand Michels tag aynen phenninch vnd Nevnthalben schilling pfenning wienner mvniz von ierem aygen das sev habent inder stat vnd vmb dev stat ze Tvln das wier von in haben van alten zeiten, vnd wanne wier den vor genanten dienst versavmen in ze geben oder ierem amptman der iers gvets phleger ist in der Stat so schol dar vmb geschehn also purchrechts reht vnd landes gewonhait. Das dev red fuerpas stet weleib geb wier der Samnvng des vorgenanten Gotshavss disen prief ze einem vrchvnd versigelt vod westetet mit vnsern Insigeln. Des sind zevich her alber von Gozesdorf. her Chvnrat der Mvnich. Chalhoh vnd sein prvder Chvnrat von alarn. Leupolt der Smitsperger. vlreich der Mayerhofer vnser Schaffer ze den zeiten. Eberhart der pavmgartner. Chvnrat der Gavsrab. Pvrchhart sein Svn. Meynhart purger ze Tuln vnd anderr frvm levt genvch den die sach vnd dev red wol chvnt ist. Der prief ist gegeben do von Cristes gepurd ergangen warn Tavsent Jar drev hvndert Jar dar nach in dem aynleften Jar pey probst Trosten zeiten des Svntags nach Phingsten in vnserm Gotshavs ze Tvln.

Source Fulltext: FAIGL, Herzogenburg (Wien 1886) S. 41