Ich Herwort von Egendorf vergih vnd tuen chunt alle den die disen prief an sehent oder lesen horent die nu lebent oder her nach chunftig sind Das ich an dem Cehent datz Egendorf chlaynem vnd graussen der meinem herren dem Probst von Hertzogenburg zv gehoret vnd seiner pharr dhain reht nicht han vnd avch meinen Svn Dietreichen dhain reht an erbet an dem vor genanten Cehent noch dhainen meiner erben wan wenn ich den selben Cehent nicht westen nach meins herren des vorgenanten Probst willen so er ander sein Cehent stift, so let er in mit allem reht wol wem er wil. Dar vber ze einem vrchvnd gib ich den prief der Samnvng vnd dem Probst des Gotshauss ze Hertzogenburch versigelt vnd westetiget mit hern Otten Insigel von weissenwerch hern walchuns des Purchgrauen von Sitzenperge mit mein selbs Insigel vnd meins Suns Insigel. Des sind zevich her Chunrat von Arnstayn. her Gvndakcher von Retelnperg. her Herwort von wielantstal. her alber von Gozesdorf. Levpolt der Smitzperger Eberhart der Rihter ze Hertzogenburch vnd anderr frvmer levt genuch, den disev sach vnd red wol chunt ist. Der prief ist gegeben nach Cristes gepurd vber Tausent jar drevhundert jar dar nach in dem zweleften jar an Sand Jorgen Tag ze Hertzogenburch in dem Gotshauss.

Source Fulltext: FAIGL, Herzogenburg (Wien 1886) S. 44