Ich Hertweich der Lo^ehler vnd mein Hausvraw vro Gerdraut wier vergehen vnd tuen chunt alle den die disen prief an sehent oder lesen horent die nv lebent oder her nach chunftig sind Daz wier mit verdahtem muet vnd mit guetem rat vnserr pesten vreunt vnd auch mit guetem willen aller vnserr erben haben gegeben hintz hertzogenburch der Erbern samnvng Sand Jorgen Gotshauss vnser guet das vnser rehtes aigen ist gewesen vnd vnserr vordern daz gelegen ist ze vdmar veld pei Lengenpach vnd alle jar dienet vier pfenning vnd drey schilling pfenning wienner gemainer mvnizz an Sand Michels tag, Daz guet daz hab wier gegeben der Samnvng des vorgenanten Gotshauss mit der aygenschaft vnd mit alle dem reht vnd wier iz vnd vnser vordern haben gehabt vnd haben daz getan durch vnserr vnd all vnserr vordern sel willen, also weschaidenleich daz man van dem vorgenanten guet, der Samnvng der erbern vrauwen dez Gotshauss dez vorgenanten schol ier Slafhaus da van ewichleichen welevhten. Daz dev red stet weleib geb wier der Samnvng dez vorgenanten Gotshauss disen prief ze einem vrchund versigelt vnd westetiget mit vnserrs erbern herren Insigel hern Otten van Celking vnd ich Hertweich der vorgenant mit mein selbers Insigel vnd mit meines prueder Chunrats Insigel. Dez sind zevich her Chunrat van Arnstain her Gundakcher van Retelnperg her Dietreich der Puechperger wan wazzerwerch her Ott van weissenwerch her Hainreich vnd her walwraun zwen prueder die Cinken her Herwort van wielantstal her alber van Gozesdorf her wernhart van Nuzdorf Chunrat der Perger Leb van vreuntshausen vnd sein prueder Chunrat Hainreich vnd sein prueder Helmweich die Reihholsperger vnd anderr frvmer vnd Erberr Levt genuech den dev red wol chunt ist. Der prief ist gegeben da van Cristes gepurd warn ergangen Tausent jar drevhvndert jar dar nach indem drevtzehentem jar an Sand Jorgen tag ze Hertzogenburch in dem Gotshauss.

Source Fulltext: FAIGL, Herzogenburg (Wien 1886) S. 46-47