Ich Herwort van Egendorf tuen chunt alle den die disen prief ansehent oder lesen horent die nv lebent oder her nach chunftig sind. Daz ich mit meins herren genaden Graf Perhtoltz van Hardeke vnd mit seiner gvnst. mein gvet. daz ich. van im. ze inwert aygen gehabt han. Datz Egelse pei wiermla auf Reutekchern an cehen viertzehen schilling geltes, mit weyset vnd mit aller raittung die man halb dient an Sand Jorgen Tag. vnd halb an Sand Michels Tag. wienner pfennig gemainer mvnizz. gegeben han. dem Gotshaus des Gveten Sand Jorgen ze Hertzogenburch. vnd aller der Samnvng des selben Gotshaus. ze rehtem aygen. durch meiner sel willen, vnd aller meiner vodern. vnd ist daz geschehen mit meiner pesten vrevnt rat. vnd aller meiner erben, gvetleichem willen. Ich han avch. dem vorgenanten Gotshaus vnd der Samnvng daz vorgenant guet gelobt ze schermen. vnd avch den selben scherm hat gelobt mit mier her wernhart der Drvhsetz van vezesdorf. vnd Dietreich mein svn. als man aygen ze reht scherm schol. Gieng wier in auer dez ab wiettann schaden sev dez nemen. den schulle wier in ab tuen vnd schullen sev daz haben avf allem vnserm gvet in O^esterreich. Daz dev red stet weleib. Gib ich in disen prief. mit meins herren Insigel. Graf Pertolts van Hardek versigelt vnd mit meinem Insigel. vnd hern wernharts des Drvhsetzen vnd meins svns Dietreich s. Dez sind zevich her Chunrat van Arnstain. her Gvndakcher van Retelnperg. her Ott van Gravenwerd. her Herwort van wielantstal. her alber van Gozesdorf. Leb Druhsetz vnd Leb van vrevntshausen. vnd ander Erber levt. Der prief ist gegeben da van Cristes gepurd warn ergangen Tausent lar drev hundert iar dar nach in dem viertzehentem iar. an dem avfvart Tag. Datz Hertzogenburch, in dem vorgenantem dez Gveten Sand jorgen Gotshaus.

Source Fulltext: FAIGL, Herzogenburg (Wien 1886) S. 50