Ich Stephan Eisgrueber tuen chunt allen den die disen prief an sehent oder lesen horent die nu lebent oder her nach chunftig sind, daz ich mit meiner pesten vreunt rat. vnd mit meiner hausvrauwen vron Elspeten. vnd meiner chind vnd aller meiner erben gvetleichem willen, mein reht aygen. datz vngerdorf. daz mier mit rehter gvlt waz nevn shilling gelts. avf zwain lechen vnd waz dar czve gehort ze veld vnd ze dorff. ledichleich gegeben han. probst Trosten vnd seiner Samnung dem haus dez gueten Sand Jorgen ze Hertzogenburch. vmb ain guet. daz si gehabt habent ze heroltsdorf. daz in an rehter gvlt waz. cehen vnd Siben schilling gelts. vnd mier daz selb gegeben habent vnd waz dar zve gehort ze veld vnd ze dorff ze rehtem aygen vnd ze wider wehsel paidenthalben an allen aufschatz. Ich han auch in daz vorgenant guet ze vngerdorf vnd auch mein hauswraw vro Elspet gelobt ze schermen. nach aygens reht in Osterreich, gestuend auer wier in dez ab. wiettainen schaden si dez nemen den schull wier in ab tuen, vnd schullen si auch daz haben auf dem vorgenanten widerwehsel den si vns gegeben habent vnd avf allem vnserm guet daz wier haben in Osterreich, wer auer wier niht. so schol in daz vorgenant guet schermen als reht ist. Her Alber von Gozesdorf. Fridreich der vizzlinger Chunrat der Gnevss van lobstorf. Chvnrat der Gnevss van Hagendorf wan si daz selb mit gutleichen willen, vnd mit ier trevn gelobt habent. gestvenden si in dez ab. wiettainen schaden si dez nemen. an chost vnd an arbait. den schullen sev in ablegen vnd schullen avch sev daz haben auf allem dem guet, daz sev habent in Osterreich. Daz dev red stet weleib. gib ich in den prief ze rehter stet vnd vrchund. versigelt mit meinem insigel. vnd auch mit der insigel die sich den scherm angenomen habent mit mier als vor gescriben ist. Dez sind gezevig her Chunrat von Arnstain her Gvndakcher van Retelnperg her Ott van weizzenwerch her Dietreich van Hertweigstain. her Herwort van wielantstal. her wernhart van Nuzdorf Hainreich van Reichholtsperg vlreich Totzenpech Meinhart van wagrayn. vnd ander erber levt. Der prief ist gegeben nach Cristes gepurd uber drevtzehen hundert Jar dar nach in dem viercehentem Jar an Sand Gregorii tag in der vassten ze Hertzogenburch.

Source Fulltext: FAIGL, Herzogenburg (Wien 1886) S. 47-48