Ich Dietreich Puechperger van waisserwerch, vergih vnd tuen chunt alle den die disen prief an sehnt oder lesen horent. die nv lebent vnd her nach chunftig sind. Daz ich mit meiner gueten vrevnt rat vnd meiner hausvravn vron Gerdrauten vnd aller meiner erben gutleichen willen, meins aygens. ain halbs lechen pey Hertzogenburch. daz pittrolf van Retelperg van mier ze lehen het. vnd mit meinem willen ze purchrecht Ekchern getaut ward, vnd mier dar nach ledich wart, vnd man mier da van dient an fumf fünf schilling pfenning wienner munizz. an Sand Michels tag. vnd viertzehen hvener ze vaschang. alle iar. durch aller meiner vadern sel willen, vnd auch mein selbs Hayl. gegeben han dem Gotshauss des Gveten Sand Jorgen ze Hertzogenburch. vnd alle der samnvng des selben Gotshauss. ze rechtem aygen. als ich vnd mein vadern. daz selb aygen. her haben praht. vnd han in auch gelobt, vnd auch mein hausvrav vro Gerdraut, daz var genant aygen ze schirmen wo in des not geschieht als reht ist in O^esterreich, gieng wier in dez scherms ab dez ob Gott wil niht geschicht, wietannen schaden si dez nemen. an dem aygen. vnd an der chost. den schull wier in abtuen, vnd schullen sev daz haben avf allev dev vnd wier haben in O^esterreich. Daz dev red stet vnd vnverchert weleib. Gib ich im dem Gotshauss vnd der samnvng disen prief. versigelt mit hern Gvndakchers Insigel van Retelperg. vnd mit dem mein selbs. vnd mit dem Otten dez weizzenwerger ze ainem rehten vrchund. vnd ze gantzer stetichait. Des sind zevich her Chunrat van Arnstain. her Chunrat Tiernstainer her Ott van Ravr her Seifrid schench. her Herwort van wielantstal. her Alber van Gozesdorf. vnd vlreich der Totzenpech alram van der Linden Leupolt Smitzperger vnd ander erber levt. Der prief ist gegeben nach Christes gepurd vber Tausent iar drev hundert iar dar nach in dem fvnftzehentem iar an vnser vraun tag in der vasten ze Hertzogenburch in dem Gotshaus.

Source Fulltext: FAIGL, Herzogenburg (Wien 1886) S. 51-52