Wier Trost von Gotes genaden Probst vnd avch alle dev Samnvng Sand Jorgen Gotshauss ze Hertzogenburch Tuen chunt alle den die disen Prief an sechent oder lesen horent die nv lebent vnd her nach chunftig sind. Daz wier mit gemainem rat vnd mit guetem willen. Chvenraten dem Gnevssen ze Lobsdorf vnd seiner hausvravn vron Elspeten. vnd allen ieren erben, vnsers Gotshauss rehtes aygen, ein Gvet daz gelegen ist datz Peysdorf avf einem lechen. zwai pfunt pfennig wienner gemainer mvnizz. Datz Hippendorf, van drithalbm lechen. fvnftzehen schilling, datz Pvelndorf van ainem lechen cehen schilling. Datz Pravtezz van ainem halben lechen sehs schilling, Gegeben haben ze rehtem aygen. ze widerwechsel. vmb ander gvet daz ier rehtes aygen gewesen ist, vnd daz vns vnd vnserm Gotshauss gelegen ist In der pfarr ze Chulevb. Datz Teusing drey schilling geltes wienner pfenning gemainer mvnizz. vnd zwelif ches. Datz den hofsteten. van ainem hof drey schilling vnd zwelif Ches. Datz ydungsstetten. van ainem hof funf vnd sibntzig pfenning. Sehs Ches. ain Gans vnd vier Huener. Da selben van ainem andern hof. funf vnd sibntzig pfenning. Sehs Ches ain Gans vnd vier Hvener. In der pfarr ze Hvrben. Datz Mutscherat. Drey vnd Tzwaintzig mettzen chorns. vnd Drey vnd Tzwaintzig mettzen Habern. Sehs Ches vnd vier Hvener. Da selben van ainem Jevch. funftzehen pfenning. Datz Chulevb in dem alten Marcht ahtzig pfenning van ainer Hofstat Daz er Chuenrat Gnevss. der vorgenant vnd sein hausvrav vnd ier erben gegeben habent. der Samnvng des gveten Sand Jorgen Gotshauss ze Hertzogenburch ze rehtem aygen. als er iz vnd sein vordern habent gehabt, an dem Gvet daz er vns gegeben hat daz vor wenant ist. da wart die Gvlt hocher geschatzet, dann vnsers Gvetes gult, daz wier im gegeben haben, dev selben vber tewwer hat er gegeben vns vnd vnserm Gotshauss. durch Got vnd hail seiner Sel. vnd aller seiner vordern, wier haben avch Chunraten dem vorgenanten vnd seiner hausvravn vnd ieren erben vnser gvet gegeben, mit allem nvtz ze rehtem aygen. vnd dienst als wier iz gehat haben, vnd mit allem dem reht vnd sev vns ier gut gegeben habent, vnd vnserm Gotshauss. wier schullen auch dez Gvetes. daz wier in gegeben haben, ier scherm sein, als aygens reht. vnd gewonhait ist in Osterreich. Dar vber daz dev red stet weleib geb wier Chunraten Gnevssen vnd seiner hausvravn vron Elspeten. vnd allen ieren erben, disen prief ze ainem vrchund versigelten mit vnsern paiden Insigeln. Dez sind zevch her Chuenrat van Arnstain. her Gvndakcher van Retelnperg. her Herwort van wielantstal. her alber van Gozesdorf Leb van frevntshausen. Hainreich der Reichholsperger Leupolt der Smitzperger vnd ander erber levt. Der prief ist gegeben da van Christes gepurd warn ergangen Tausent Jar drevhundert Jar darnach in dem viertzehetem Jar an dem avfvart Tag ze Hertzogenburch. in dem Gotshauss dez Gvetem Sand Jorgen.

Source Fulltext: FAIGL, Herzogenburg (Wien 1886) S. 48-49