Ich Chvnrat von Arenstayn vergich vnd tuen chvnt allen den div disen prief an sechent oder horent lesen div nv lebent vnd her nach chvnftich sint. Daz ich mit wol bedachtem muet vnd mit gesampter hant vnd mit zeitigem rat ze der zeit do ich iz wol getuen mocht vnd mit meiner hausvrowen vro Ofmein vnd mit aller vnserr erben guetem willen vnd gvnst Dem ersarnen Kovent vnd aller der Samenvng datz Hertzogenburch indem chloster zv ir Oblai meins rechten vreien Aigens ain lechen datz Chreling durch meiner selle willen geschaffet han mit allem dem nvtz vnd dar zv gehoret paidev ze velde vnd ze dorf iz dient auch daz vorgenant lechen datz Chreling fvnf vnd zwaintzich Metzen Chorns vnd fvnf vnd zwaintzich Metzen Gersten vnd alle hochzeit zwen ches vnd ain gemastev Gans vnd ain herbest hven. vnd ain vaschanch hven. Div selben gult auf dem vorgenanten lehen datz Chreling han ich in geschaffet noch einem tot, also beschaidenleich daz siv meiner sel ewichleich dar vmb gedenchen sullen. si schallen auch mit dem vorgenanten guet allen iren frvmen schaffen swie si wellen, so han ich zwai phunt geltes inne gehabt datz Schonenstrozze pei Rabenspurch di da ligent auf zwain lechen div meiner hausvrowen vron Chvnigvnt der Pollenhaimerinn der got genade recht aigen sind gewesen vnd sev von ir vater anerstorben waren, div selben zwai phunt wienner phenning geltes schuef div vorgenant mein aigev hausvrowe vro Chvnigvnt dem vorgenanten Chloster vnd dem Covent datz Hertzogenburch also beschaidenleich Datz ich sev untz meim tot solt haben in nutz vnd gewer vnd daz vorgenant gescheft vm div zwai phunt geltes datz Schonenstrozze hat si mit aller irer erben guetem willen vnd gunst geschaffet hintz Hertzogenburch dem Covent vnd der samenvnge da selbe. vnd auch allen iren frvmen damit geschaffen. Der selben zwair phvnt geltes an der vorgenanten stat han ich mich Chvnrat von Arenstayn recht vnd redleich verzigen durch meiner sele willen vnd meiner vordern sel vnd han iz dem Gotshaus ze Hertzogenburch auf geselt vnd gegeben vnd gib in dar vber disen prief ze vrchvnde diser sache versigelt mit meim Insigel vnd mit hern Gvndachers Insigel von Retelperg vnd sint des gezevch Her Christan Druchsetz von Lengpach. her Ott von weissenwerch her Dietreich von Puechperg Alram auz awe. Leupolt der Smitzperger vnd ander piderb leut genuech den div sache wol chunt ist. Ditz ist geschehen vnd der prief gegeben datz zekking da von Christes gepuert ergangen warn Dreutzehen hundert Jar vnd in dem drei vnd zwaintzigisten lar an dem Plvemoster tag.

Source Fulltext: FAIGL, Herzogenburg (Wien 1886) S. 81-82