Ich Eberhart von Chatzenperg vnd mein hausvrowe vro Elspet vnd auch ich Gedraut von Olarn vnd all vnser erben ver iehen an disen prief vnd tuen chund allen den dev in lesent oder hornt lesen di nu lewent oder her nach chumphtich werdent. Daz wir mit guetleichem willen vnd mit gunst aller vnserr vreunt vnd ze den zeiten do wir iz wol getuen machten haben gegeben ain lehen datz nider winden pei der Traisem daz vnser rechtz aigen gewesen ist do von man dient ein phunt phenning gemainer wienner munzz an sand Mychels tag vnd ze drin hochtzeiten zwaime funhtzk phenning fuer sechgs ches vnd zwo gens vnd sechgs hvenrr vier an sand mychels tag vnd zway ze vaschang vnd sechtzk aier ze Ostern durch aller vnserr vordern sel willen vnd auch vmb vnser selbs hails willen dem gotshaus des gueten herren sand Jorgen ze Hertzogenbtirch vnd auch alle der samnung des selben gotshaus mit alle dem recht vnd nutz vnd iz vnser vodern vnd wier selben ez her pracht habent iz sei gestift oder vngestift versuecht oder vnversuecht ze veld vnd ze dorf ledichleich vnd vnverchummert vnd haben in ovch daz gelobt mit vnsern treun daz wier fuerwaz nimmer mer dhain zu versicht noch dhain ansproch haben schullen ze dem vorgenanten lehen vnd zu dem dienst der do zue gehoret vnd schullen in ovch daran dhainen gewalt tuen weder mit worten noch mit werchen vnd schullen ez ovch mit niemen schaffen daz in dar an dhain gewalt wider var. Dar vber ze pezzerr sicherhait so setz ich vorgenanter Eberhart von Chatzenperg dem egenanten Sand Jorgen gotshaus vnd auch aller der samnung des selben gotshaus ze Hertzogenburch ze sampt mier Herlieben der offt genanten vrowen sun vron Gedrauten von Olarn mit seinem Insigel ze rechtem scherm des egenanten guetes fuer allen chrieg vnd fuer alle ansproch als des Landes sit vnd gewanhait ist in Osterreich vnd swaz si dez schadens nement von vns oder von vnsern erben den selben schaden schullen si haben auf alle dev vnd wier haben in dem Lande ze Osterreich. Si schullen ovch da mit allen ieren frum schaffen ze verchauffen ze versetzen oder wandeln da mit swi si wellent mit vnserm guetem willen an allen chrieg vnd an allen iersal vnd haben in ovch daz gelobt mit vnsern trevwen daz wir sev nichts dar an ierren weder mit worten noch mit werchen. Daz disev red also stet gantz vnd vntzebrochen beleib Dar vber so gib ich Eberhart von Chatzenperg dem egenanten Sand Jorgen gotshaus ze Hertzogenburch vnd der samnung des selben gotshaus disen prief versigelten mit meinem Insigel vnd mit Herlibes insigel der egenanten vrown sun vron Gedrauten von Olarn ze einer steten sicherhait fuer alle ansproch. Vnd sind der red gezevch Her Chunrat von Tierstain Her Hainreich von pappenhaim Her Gundacher von Retelnperg Her Ott von weizzenberch gesezzen datz retelnperg Her wernhart von Nuzdorf vnd sein sun Her Chunrat Her leb von vreuntzhausen vnd ander pidiber leut genueg den dev red vnd dev sach wol chund vnd gewizzen ist. Der prief ist gegeben do von Christes gepurd warn ergangen Tausent Jar drev hundert Jar dor nach in dem vier vnd zwainzkistem Jar an sand laurencen tag Datz Hertzogenburch in dem gotshaus.

Source Fulltext: FAIGL, Herzogenburg (Wien 1886) S. 99-101