Ich Andre von Svnnenberch vnd ich Chvnegvnt sein hovsvrowe. Wir veriehen vnd Tvn chvnt allen den die disen prief lesent oder horent lesen die nv lebent vnd hernach chvnftich sint. Daz wir mit vnserr erben gvten willen vnd gvnst mit verdachtem mvte zv der zeit do wir ez wol getvn mochten recht vnd redelichen ze widerwaechsel geben haben dem Erbaern Goteshavse datz sand Georgen ze Hertzogenburch an aynlef phenning ein halb phvnt wienner phenning geltes vnsers aygens die da liegent ze Fvendorf ovf ainer hofstat die da bestift ist mit sechs Jevchharten akchers vnd mit ainer wisen da Gebhart ovfgesezzen ist Also mit ovzgenomner rede daz vns daz selbe vorgenante Goteshovs datz Hertzogenburch vnd seine verwaeser ze rechtem widerwechsel herwider geben habent Drei schillinge wienner phenning geltes ires vreyen aygens die auch da selbens ze Fuendorf gelegen sint ovf einem lehen also daz man ewechleichen dienen schol alle Jar an sand Mychels Tage die vorgenanten an aylef phenninge ain halp phvnt geltes dem Egenanten Goteshovse datz Hertzogenburch. wir setzen auch vns Ich vorgenanter Andre von Svnnenberch vnd Ich Chvnigvnt sein hovsvrowe mit sampt vnsern erben vnverschaidenlichen dem egenanten Goteshovse datz Hertzogenburch vmb die vorgenanten gvlte als vor geschriben stet ze rechtem gewern vnd scherm fur alle ansprache als aygens recht ist vnd des Landes recht in Osterrich. vnd daz dise wandelunge zwischen vns also staete sei vnd vntzerbrochen beleibe Dar vber so geben wir disen prief ze ainem sichtigen vrchvnde vnd ze aynem waren gezevge vnd zv ainer ewigen vestnvnge diser sache versigelten mit vnserm Insigel vnd mit vnsers Ohaymes Insigel hern vlreichs von Meysowe obristen Marschalchs in Osterreich der diser sache gezevg ist mit seinem Insigel. Diser prief ist geben ze wienne nach Christes geburt drevtzehen hundert jar dar nach in dem vier vnd zwaintzigistem jare des Phinstages vor sant Mychels Tage.

Source Fulltext: FAIGL, Herzogenburg (Wien 1886) S. 101-102