Albertus Dei gracia Patauiensis Episcopus ad perpetuam rei memoriam. Sollicitudo pastoralis nostri exigit officii non solum diuinum cultum augere verum eciam augmentatum per Christi fideles promovere, et ad debitum perducere effectum. Sane venerabiles viri Trosto Prepositus Totusque Conventus Monasterii Herzogenburg ad nostram perduxerunt presenciam quod providus vir Wernhardus Miles de Nuzdorf cultum diuinum augere desiderans ob remedium sue anime suorumque progenitorum de consensu ipsorum expresso Ecclesiam in Nuzdorf Ecclesic in Herzogenburg iure filiali subiectam pro eo quod de cetero perpetuis temporibus Rector in ipsa residenciam faceret personalem cujus personali residencia hucusque caruit Ecclesia memorata, viginti librarum bonis et utilibus redditibus dotavit et curiam totalem propriis sumptibus construxit pro mansione Rectoris ibidem quem dictus Prepositus dabit de gremio sui Monasterii antedicti petentes humiliter a nobis, ut quod per prefatum militem bona et sancta intentione factum est auctoritate nostra confirmare dignaremur. Nos igitur precibus Prepositi et Conventus predictorum favorabiliter inclinati, predicta sub modis et conditionibus que in litteris super hoc confectis plenius eontinentur ex certa sciencia confirmamus. volentes ut omnia promissa perpetuo inviolabiliter observentur. Si vero ullo tempore Prepositus et Conventus supra dicti prefatos redditus imminuerent vel rectorem pro tempore qui fuerit personaliter residere non facerent, seu in residencia quoquo modo impedirent, ex tunc ipsos Censura Ecclesiastica et per alia debita remedia requisiti per saepe dictum Wernhardum seu ipsius haeredes ad explendum et servandum omnia promissa compellemus. Ut autem omnia praemissa in perpetuum rata maneant atque firma presentes nostras dedimus litteras nostri Sigilli munimine roboratas. Datum et actum ad Sanctum Ypolitum X°II. Kalendas Februarii Anno Domini Millesimo CC°C vicesimo quarto.

Source Fulltext: FAIGL, Herzogenburg (Wien 1886) S. 89-90