Ich Hainreich von Chirchling vergich an dem prief vnd tuen chund allen den die in lesent oder horent lesen. Daz ich di aigensehaft di ich gehabt han auf einem lehen ze Goetzeisdorf vnd auf der wein wachse ze Plessengraben ze veld vnd ze dorf mit allem dem rechten vnd dar zve geho^ert, ez sei gestift oder vngestift, versuecht oder vnuersuecht swie so daz genant ist verchaufet han hern wernharten von Nuzdorf vmb ein halbez phunt phenning wienner munnzz der er mich gar vnd gentzleich gewert hat vnd daz selbe guet hat der vorgenant her wernhart von mir gehabt ze rechtem purchrecht vnd hat mir alle iar an sand Michels tag da von gedient sechs phenning wienner phenning also mit auzgenomner rede daz ich di selben aigenschaft vnd daz purchrecht mit gult mit alle gewidemt vnd geben han dem gueten Herren sand Johans hintz Nuzzdorf auf daz gotshaus mit allem dem rechten vnd dar zve gehort als hie vo^er benant ist vnd als ich vnd mein vo^edern ez her pracht haben vnd bin auch ich des gueten herren sand Johans vnd swer seines goteshaus phleger ist an dem selben guet scherm vnd gewer fuer alle ansprach als des landes recht ist ze Osterrich. waer aber daz ich des scherms abgieng swer danne landes herre in Osterrich ist der sol mich des no^eten mit meinem gueten willen daz ich alles daz laiste daz hie vo^er verschriben ist an dem brief. vnd sint der sache gezeugen. her Chunrat der Pergaer. her Leb von vreuntshausen. Chunrat der Gokkendorfer vnd ander piderb laeut genueg vnd dar vmb daz die sache also staet vnd vnzebrochen beleibe gib ich dem gueten herren sand Johans den brief versigelten mit meinem Insigel. Der brief ist gegeben ze wienn nach Christes geburde Dreutzehenhundert jar dar nach in dem vier vnd zwaintzigistem jar an dem Perchttag.

Source Fulltext: FAIGL, Herzogenburg (Wien 1886) S. 88-89