Ich Gerhart der Genevz von Ernstprvnn vnd mein Hausvrow vrow Agnes vnd vnser Svn Hainreich vnd ander vnser paider Erben wir ver jechen an disem prief vnd tuen chvnt allen den diu in sechent oder hornt lesen diu nv lewent oder her nach sint. Daz wir dem Erbern Herren Hern Herlieben Probst Sand Georii gotshaus ze Herczogenburch vnd alle der Samnvng des selben Gotshaus gegeben hawen vnsers Rechten aigens ein lechen dacz Penning mit alle dem recht vnd auch nvtz vnd wir iz vnd vnser erben her pracht haben ze veld vnd ze dorf versuecht oder vnversuecht gestift oder vngestift swie daz genant sei also beschaidenleich. daz sew vns ze wider wechsel gegewen habent irz Rechten aigens ein lechen ze Steinpach. vnd wann ich vorgenanter Gerhart der Genewz vnd mein Hausvrow vrow Agnes vnd vnser paider Erben loben mit vnsern trewn dem vorgenanten Herren Hern Herliben Probst ze Herczogenburch vnd alle der Samnvng des selben gotshaus daz wir des selben lechen ze Penning gewer vnd auch scherm sein fuer alle ansprach als aigens recht ist vnd landes gebanhait in Ostereich. vnd auch zv einer pessern gewishait vnd zv einer gantzen stet lob ich Hainreich der Gnewz sein Prueder mit meinen triwn daz ich dez vorgenanten lechen gwer vnd auch scherm pin. des vorgenanten gotshaus ze Herczogenburch mit sampt Gerharten dem Gnewzzen von Ernstprvnn vnverschaidenleich swaz an einem abgieng daz schullen sew auf dem andern haben diu vorgenant Samnvng ze Herczogenburch. nem aver dar vber daz selb gotshaus dhainen schaden an dem lechen dacz Penning mit recht. den schulle wir in allen ablegen an alle wider red, tet wir des nicht s wer dann Lancz fuerst ist in Osterreich der schvl in mit vnsern gvetleichen willen in gantwurten vnserz guetz so vil alz wir iz haben in dem laut zv Osterreich vnd schullen sew daz selb guet so lang inn haben vntz wir in alles daz gelaisten alz hie verschriben stet an disem prief. Daz diu red stet vnd vntzebroehen weleib dar vber geb wir disen prief versigelt mit vnsern insigeln. Ich vorgenanter Gerhart der Gnewz mit meinem insigel. vnd ich vorgenanter Hainreich sein Svn mit meinem insigel. vnd ich vorgenanter Hainreich sein Prvder mit meinem insigel. zv einem Offen vrchvnd vnd zv einer steten sicherhait diser sachh. Der prief ist gegeben da von Christes gepvrd ergangen warn Dreuzechhundert Jar dar nach in dem zwai vnd dreiskizten jar an Vnser Vrawn tag zv der Liechtmizz in dem gotshaus ze Herczogenburch.

Source Fulltext: FAIGL, Herzogenburg (Wien 1886) S. 120-121