Ich Choloch von pernaw vnd ich Elspet sein hausvraw vergechen vnd tuen chvnt allen den die disen prief an sechent. lesent oder horent lesen die nv lebent vnd die her nach chvnftig sind. Daz wier mit verdachtem mvet ze der zeit do wier iz wol getuen machten. mit vnser pesten vrevnt rot vnd mit guetem willen vnd gvnst aller vnser Erben. ain halbes lechen daz leit ze Havzenveld. vnsers rechten aygens. daz mein hausvravn vron Elspeten an erstorben ist. von ier vater hern Andren von Inning dem got genod. vnd daz sei mit rechter fuerzicht angevallen ist do si mit iern geswistreiden getailt hot. gegeben haben ledichleichen vnd gentzleichen dem gotshaus vnd der samnung. des gu^eten herren sand Gorgen ze Hertzogenburch. auf die Oblay. durich vnser sel vnd aller vnser vadern sel willen mit ganzer aygenschaft. vnd mit allem dem Nutz vnd recht. vnd wier iz vnd vnser vadern in aygens geber her procht haben. allen ieren vrum domit ze schaffen. als mit anderm ierem aygen. an allen iersal. vnd ist dienst alle iar auf dem var genantem halben lechen. fvnf schilling geltes wienner phenning gemainer mvniz. die man dient an sand Michels tag. vnd dar vber durich pezzer sicherhait. so setzen wier vns Ich Choloch von pernaw vnd ich E1spet sein Hausvraw. vber dev vorgenanten gult dem gotshaus vnd der samnung des gueten herren sand Gorgen ze Hertzogenburch ze rechtem scherm fuer alle ansproch. als aygens recht ist vnd des landes recht in Osterreich. wer aver daz sev an dem vor genanten guet mit recht dhainen schaden nemen. den selben schaden schullen sev haben auf vns vnd auf allem vnserm guet. daz wir haben in dem Land ze Osterreich. vnd daz dev red stet weleib vnd vnzeprochen. Dar vber geb wier in disen prief ze ainem offen vrchund. vnd ze ainem woren gezevge diser sach versigilten mit vnserm Insigil vnd mit meiner geswein Insigil Wilhalms von Inning. vnd mit Wulfings Insigil seines prueders. vnd mit Wulfings Insigil von Inning meiner hausvravn veter. vnd mit meines Oechaims Insigil Wulfings von Pielach. Des sind zevg Her vlreich von Sitzental vnd Jans der R ... vnd Magenstsein prueder. vnd levtold von Ainoed vnd Gotvrid sein prueder vnd Wolfger von wielandstal vnd levpolt der Smitzperger. vnd ander Erber levt genv^ech. den disev sach wol chvnd ist. Der prief ist gegeben ze Herczogenburch in dem Chloster. do von Christes gepuerd waren ergangen Tausent Jar. drev hvndert in dem drev vnd dreizkisten Jar dar nach an vnser vravn tag ze der Liechtmesse.

Source Fulltext: FAIGL, Herzogenburg (Wien 1886) S. 125-126