Ich Weichart von Raetelperige. vnd ich Gotschalich von Vlachenekke. vnd ich Pericht sein hausurowe. Wir vergehen vnd tv^en chvnt allen den die disen brief lesent oder ho^erent lesen. die nu lebent vnd hernach chvnftich sint. Daz ein Chriege gewesen ist zwischen vns vnd vnsern erben an ainem tail vnd zwischen den erbern Gaestleichen Herren Apt Fridreichen ze Varnpach. vnd Probst Herlieben ze Hertzogenburch. vnd Probst Haugen dez Gotzhaus ze sant Andre, vnd der vorgenanten Dreyer Gotzheuser an dem Andern Tail. vmb ein Waid Holtz vnd Grunt, vnd vmb ein Wazzer. vnd Wazzerganch. Den selben Chriege haben wir paidenthalben mit gu^etem willen lazzen. an die fu^enf erber manne. an hern Wernharten von Nuzdorf. an hern Leben von Frevntzhausen. an hern Meinharten von Po^etingen vnd an hern Gotfriden vnd an hern Levtolden die Prv^eder von Ayno^ede. Die habent den selben Chriege baidenthalben mit vnserm guten willen, also beschaiden. swaz von dem alten Marichstain von Pha^effingen Trift v^eber nach snv^ermazze vber die Traysem vntz an den alten Marichstain vnder dem Grazperige swie so daz genant ist. Swaz niderhalben der Marichstain ist. waid vnd Grvnt Holtz vnd wazzer vischwaide swie so daz genant ist. daz daz alles sol furbaz ewichleichen der egenanten Gotzhvser sein da bei ewichleichen ze beleiben, vnd furbaz allen irn frvmen damit ze schaffen alz ez in allerpest wol chvm vnd fu^ege an allen irsal. vnd suln auch wir noch alle vnser erben si fu^erbaz ewichleichen mit dhainer lay Sachen, dar an nicht en irren. Auch habent si beschaiden. swaz Oberhalb der Marichstain ist. waid vnd Grunt Holtz vnd wazzer vischwaide swie so daz genant ist. daz sol fu^erbaz ewichleichen vnser vnd vnser erben sein, damit auch ledichleich vnd vreileich allen vnsern frumen ze schaffen alz ez vns aller pest wol chv^em vnd fv^ege an allen irresal. Vnd habent auch beschaiden daz wir baidenthalben den Mv^elvanch weder Oberhalben der Marichstain noch niderhalben. nicht en irren suln. vnd daz diseu schidunge fu^erbaz ewichleich also staet vnd vnzerprochen beleibe. Dar vmb so geben wir den erbern Herren apt Fridreichen ze varnpach vnd Probst Herlieben ze Hertzogenburch. vnd Probst Haugen dez Gotzhaus zu sant Andre, vnd den egenanten Drein Gotzha^eusern disen brief zu einem offen vrchvnde vnd zu einem warn gezeuge vnd zu einer Ewigen vestnunge diser sache versigilten mit vnsern Insigiln vnd mit hern Chvnrades Insigil von Sirndorf zu den zeiten Hofmaister dez edeln vnd dez Hochgeborn fuersten Herczog Otten in O^esterreich vnd in Steyr. vnd mit der vorgenanten vnser Schidleut Insigiln hern wernhartes von Nuzdorf hern Lebens von Frevntzhausen hern Meinhartes von Po^etingen hern Gotfrides vnd hern Levtoldes der Pru^eder von Ayno^ede. die diser sache gezeuge sint mit irn Insigiln. Diser brief ist geben nach Christes geburt drevczehen Hundert iar dar nach in dem Dreu vnd Dreizgisten iar an sant Jo^erigen Tage.

Source Fulltext: FAIGL, Herzogenburg (Wien 1886) S. 127-128