Ich Hartvnch ze den zeiten Pfarraer ze Gravenwerd Vergich offenleich an disem Brief vnd tv^on chvnt allen den die in sehent oder horent lesen, di nv sind oder noh chvnftich werdent. Daz vmb den chrieg der gewesen ist zwischen vnserm gaestlichen vater Byschof Albert von Pazzaw vnd zwischen vnsern paiden Gotshausen ze Hertzogenwurch vnd Gravenwerd vmb einen Czehent an dem Nevnperg vnd leit in Gravenwerder Pfarr. Vmb den selben Czehent ward als verr getaidingt zwischen meinem vor gnanten Herren von Pazzaw vnd vnsern vor gnanten Gotshausaern daz der Chrieg ward gesatzt mit ainvng mein vnd Probst Herliebs ze Hertzogenburch an di vmbsaetzen vnd also beschaidenleich swem die den selben Czehent nah alter chvntschaft sagten pei iren trewen vnd pei iren ayden der vnd des Gotshaus sold den hinfu^er ewichleich geruebt haben an alln chrieg. Nv habent di selben vmbsaetzen gesaget Her Leb von Smidah Leb hern Otten Svn.*) Vlreich pei der Chirchen. Ortolf Haekchel Chalhoh Haekchel Chvnrat vnd Rueger di Druchsaetzn. daz der selb Czehent sei ze Drittail sand Jorgen gotshaus ze Hertzogenburch vnd di zwai Drittail der Pfarr ze Gravenwerd. Vnd daz mein Herr von Pazzaw noh sein Gotshaus dor an niht en haben. Vnd dor vber daz disev verschriben sache furbaz staet vnd vnzeprochen beleib. dem vorgnanten gotshaus ze Hertzogenburch von mier vnd von meinen nachomen dor vmb so gib ich egnanter Haertvnch ze einem vrchvnn disen Brief versigelten mit meinem Insigel. Vnd ze einem ewigen vnd sichtigen gezeug mit der vorgnanten schidleut Insigel Hern Lebn von Smidah Lebn hern Otten Svn. Chvnrats vnd Ruegers der Druchsaetzn. Des iares do man von Christi gepurd zalt Dreutzehen Hvnndert iar. Dar nah in dem vier vnd dreizkistem iar an dem Liehtmess tag vnser Vrowen.

Source Fulltext: FAIGL, Herzogenburg (Wien 1886) S. 130-131