Ich Ruedolf von Liechtenstain Chamerer in Steyr vnd alle mein Erben veriehen offenleich an disem prief vnd tuen chvnt allen den die in lesent oder ho^erent lesen die nu lebent oder her nach chv^enftich sint. daz wir mit gemainem zeitigem gveten rat. vnd ze den zeiten do wier iz wol getuen machten. vnd mit aller vnserr erben guetleichem willen Gegeben haben dem erbern herren hern Herlieben ze den zeiten Probst sand Goergen Gotshaus ze Herczogenburch vnd alle der samnung des Conuentes des selben gotshauses datz Herczogenburch zwelif pfunt geltes. vnd der ligent zehent pfunt gelts auf einem zehent ze Herczogenburch vnd vier vnd zwainzich pfenning gu^olt auf einem holden datz Walprestorf. vnd datz Wetzmanstal zwelif schilling auch auf einem holden, vnd da selben ze Wetzmanstal vierthalben schillinch vnd ain pfenning auf v^orbar echern. vnd hundert pfunt gemainer wienner pfenning der wier sev gantz vnd gar gewert haben. mit alle dem nutze vnd recht vnd wier iz enher pracht haben. fuerbas dem vorgenanten Gotshaus datz Herczogenburch ledichleich ze haben, ze versetzen ze verchauffen. vnd allen ieren frum da mit ze schaffen vnd geben swem sev wellen. vnd daz selb gu^oet hat der e genant herre her Herlieb Probst sand Go^ergen gotshauses ze Herczogenburch. vnd der Conuent dez selben gotshauses mier vorgenantem Ruedolfen von Liechtenstain vnd meinen erben widerlegt mit dem Marcht marchrecht vnd v^erfar ze sand Goergen daz gelegen ist pei der Tuenaw mit alle dem recht vnd nutze vnd sev iz vnd ier gotshaus gehabt haben, also mit ausgenomener red. daz sev in dem selben marcht ainen wehausten holden schullen haben hinfuer ewichleichen. vnd auch ier vischwaid vnd ier Werd habent sev auch ausgenomen. daz sev hinfuer ewichleichen iers gotshauses sein als sev vo^er von alter iers gotshauses gewesen sint. vnd auch swaz sev an dem selben v^erfar habent vber ze fu^eren zv ierem Chloster iz sein reitund oder gevnd oder mit waegen daz schol man in vber fuern an als lo^en. vnd sol auch ich vorgenanter Ruedolf von Liechtenstain vnd mein erben dez selben guetes vnd der auzgenomen rechtte des gotshauss ze Herczogenburch rechter scherm vnd gwer sein fuer alle ansproch. an alle gever als recht ist in O^esterreich. vnd man aygen zerecht scherm schol. Tue wier dez nicht swelichen schaden denn si dez naemen mit recht ze Juden oder ze Christen den schulle wier dem vorgenanten gotshaus ze Herczogenburg ganz vnd gar ablegen an alle wider red. daz lùb wier mit vnsern treun. daz schullen sev haben auf mier vnd auf meinn erben vnd auf alle dem guet vnd ich vnd mein erben haben in dem lant ze Ostereich oder auzzer lantz. Vnd daz dev sache vnd der chauf vnd der wider wechsel staet vnd vnzebrochen weleib. so gebn wier in dem offt genanten herren hern Herlieben Probst ze Herczogenburch vnd dem Conuente dez selben gotshauss vnd iern nachchomen disen prief versigelten mit dez erbern herren Pischolf Albrechts ze den zeiten Pischolf datz Passaw Insigeln. der daz durich vnserr pet willen ze einer gantzen ewigen Staetigung dar an gelegt hat. vnd ich vorgenanter Ruedolf von Liechtenstain mit meinem Insigel. und mit meiner paider sv^ene Ruedolfs vnd Otten insigel dev mit sampt mier scherm vnd gwer sint allez dez vnd hie verschriben stet an dem prief. Der sache sint auch gezeug die erbern Ritter her Wernhart von Nusdorf. her Dietmar auz der gel. her Chvnrat von Waltpresto^erf hern Wernharts svn. her Leb von Vreuntzhausen. vnd Levtold vnd Gotfrid die zwen prueder von Aino^et. vnd Pilgreim der Vleminch. vnd lans von Go^etzesdorf. vnd ander erber leut genuech den die sache wol chund ist. Der prief ist geben ze Hertzogenburch in dem Chloster do man von Christes gepuerd zalt dreuzehen hundert iar. dar nach indem vier vnd dreizzkisten iar. an sand Thomas tag des zwelifpoten.

Source Fulltext: FAIGL, Herzogenburg (Wien 1886) S. 131-133