Ich Chvnrat der Kokendorfer Vnd mein Hausvraw vrow Elspet vnd vnser paider erben wir veriehen offenleich an disem prief vnd tuen chvnt allen den dew in sechont oder ho^ernt lesen. dew nv lewent oder her nach chuftich sint. daz wir dem Erbern Herren hern Herlieb probst Sand Georii Gotzhaus ze Herczogenburch vnd alle der Samnung des selben Gotzhaus ze Herczogenburch gegeben hawen lauterlech durch Got vnsers rechten aigens zwen phenning geltz auf einer wis. leit auf der Siernich pei Sand margreten dew man in diennen schol alle iar an Sand michels tag. dew aigenschaft vnd den dienst dew hab wir in gegeben mit alle dem recht vnd auch nucz vnd wir iz gehabt haben hin fuer ewichleich in zehawen vnd pin auch ich var genanter chvnrat der Kokendorfer vnd mein hausvraw vraw Elspet vnd vnser paider erben der vorgenanten aigenschaft des Gotshaus ze Herczoburch rechter scherm vnd gewer fuer alle ansprach allz aigens recht ist vnd lantz gewanhait in Osterreich, nem auer dar vber daz Gotzhaus ze Herczoburch dar an chainen schaden mit recht den schulle wir in allen ablegen an alle wider red. daz lob wir in mit vnsern Trewn, vnd daz dew red stet vnd vntzebrochen weleib dar vber gib ich vorgenanter chvnrat der kokendorfer disem prief versigelt mit meinem Insigel zv einer Offen vrchund vnd zv einer steten sicherhait diser sachh. der sach ist auch zeug wolfker van wielantstal mit seinem Insigel der daz durch vnsern willen daran gelegt hat. Daz ist geschriben vnd der prief gegeben. da van Christes gepurd warn er gangen drewzehen hundert jar dar nach in dem fvmff vnd dreiskisten jar an sand Phillippes tag. in dem gotshaus ze Hertzogenburch.

Source Fulltext: FAIGL, Herzogenburg (Wien 1886) S. 137-138