ICH Leb von Vreuntzhausen vnd mein Hausvrowe Of vnd vnser erben veriehen offenleich mit disem prief vnd tuen chunt allen den di in sehent oder horent lesen die nu lebent oder her nach chvnftich sint. Daz wier ein guet haben gehabt datz Lebrestorf daz do leit pei Pechstal dez selben guetz sind zwai Lehen vnd ist vnser rechtes aygen gewesen. Daz selb guet als iz benant ist daz hab wier ze chauffen gegeben hern Wernharten von Nuzdorf vnd seiner Hausvrowen Agnesen vnd iern erben vm zwainczk phunt phenning gemainer wienner munzz der seu vns recht vnd redleich gewert habent. Vnd schulle auch wir dez vorgenanten guetz hern Wernhartz vnd seiner Hausvrowen Agnesen vnd ierr erben rechter scherm vnd gwer sein fuer alle ansproch als Lantzrecht ist in Osterreich vnd als man aygen zerecht scherm schol. daz hab wier in gelubt mit vnsern treun. Vnd durich pesserr sicherhait willen lub ich Chv^onrat von Vreuntzhausen auch mit meinn trewen daz ich mit sampt meinem prueder hern Leben dez vorgenanten guetz hern Wernhartes von Nuzdorf vnd seiner Hausvrowen Agnesen vnd ierr erben rechter scherm vnd gwer sei fuer alle ansproch als Lantzrecht ist in Osterreich. Nemen aber seu an dem vorgenanten guet dhainen schaden mit recht den schull wier in gantz vnd gar ablegen an alle wider red vnd an allen chrieg. Daz die red stet vnd vnzebrochen weleib dar vber gib ich in disen prief versigelt mit meinem anhangunden Insigel ze einem vrchvnd diser sache vnd ich Chvnrat von Vreuntzhausen gib in auch disen prief versigelt mit meinem anhangunden Insigel ze einer ewigen bestetigung dierr sache. Der prief ist geben noch Christes gepuerd vber Dreuzehen hundert Jar dar nach in dem sechs vnd dreizzkisten Jar dez Suntages in den Vier tagen in der Vasten.

Source Fulltext: FAIGL, Herzogenburg (Wien 1886) S. 140-141