Ich Hainreich Hern Meynharts sun von Bograim vnd alle mein erben wier veriehen offenbar an disem prief allen den div in sehent oder herent lesen, div nv sind oder her nach chunftig wernt Daz wier mit verdachtem muet mit guetleichem willen nach rat vnser pezzrern vreunt vnd zv der zeit do wirs wol machten getuen dem gotshaus des gueten herren sand gergen ze herzogenburch vnd der samnung des selben gotshaus gegeben haben lauterleich durch got vnd durch vnser sel willen vnsers rechten aygens vierczg Phenning gelts auf einer hofstat leit auf dem Aschperg, diw man in dienen schol alle iar an sant Michels tag div aygenschaft vnd den dienst div hab wir in gegeben mit alle dem recht vnd nutz vnd wir iz gehabt haben hin fur in ebichleich zvhaben Vnd pin ich auch egunanter Hainreich vnd alle mein erben der vargunanten aygenschaft des egunanten gotshaus ze herzogenburch Rechter scherm vnd auch gwer fur alle ansprach als aygens recht ist vnd lants gebanhait in Osterreich nem auer dar vber daz gotshaus daz egunant ist dar an chainen schaden den schull wir in ablegen mit recht an alle wider rede Vnd loben in daz mit vnsern trewn Vnd diser sach ist gezeug her Ruemhart van werbem mit seim insigel vnd ist auch scherm vnd gwer mit samt sein erben. Dar vber zv einer pezzern sicherhait vnd einer waren vrchv^end gib ich egunanter Hainreich disen prief versigelten mit meinem insigel vnd mit dem egunanten Hern Ruemhart insigel von pirbavm. Der prief ist gegeben do van Christes gepurd warn ergangen Tavsent iar vnd drew hundert iar dar nach in dem shechs vnd dreyzkisten iar an sant Katreyn tag ze herzogenburch.

Source Fulltext: FAIGL, Herzogenburg (Wien 1886) S. 142-143