Reverendis in Christo Patribus dominis et amicis karissimis dominis Herlibo venerabili preposito. Rimbotoni decano. Totique Collegio Ecclesie Sancti Georii in Herczogenburga. Dyetmar dei gracia prepositus. Wernhardus decanus totusque conuentus Monasterii Sancti Ypoliti. Cum deuotis oracionibus fraternam in domino karitatem. Pensantibus nobis et animo sollicite reuoluentibus, quod vita hominum velut nuncius percurrens et tamquam vmbra velociter transeat. Sitque velut nauis cuius vestigium in aquis flactuantibus non cognoscitur. et tamquam auis aera transuolans cuius itineris argumentum penitus ignoratur. ita ut homo iam floridus et amenus in ictu oculi velut lanugo que flatu venti tollitur et tamquam fumus diffusus in aere in nichilum redigatur. nec tunc sciri possit, quis nostrum dignus sit odio uel amore. Visum fuit nobis super omnia expedire ut viri spirituales qui ea solum querere debent que sursum sunt. non que super terram, decurrentia vite sue tempora sic preordinent sic prouideant sic disponant ut labore suo sic transitorio quietem perpetuam valeant emercari. Ad quod utique fiendum nichil adeo credimus profuturum. quam ut fusis pro inuicem piis obsecracionibus placabilem sibi reddant supernum iudicem qui in ira misericordie recordatur. Si enim secundum statum exterioris hominis qui sibimet quodammodo parare potest amminiculum in caritate iubemur inuicem documentis apostolicis supportare. Videtur oportunius et saluti multo congruencius. ut interior noster homo qui disiunctus a corpore nichil sibi prodesse poterit. bonorum operum exercitiis et karitatiuis oracionum suffragiis adiuuetur. Cum igitur religiosorum Ecclesie federe singularis dileccionis adunate vigili cura semper ad hoc intendere debeant. ut qui nexu carnalis amoris hic fideliter coniunguntur. solutis etiam corporibus in spiritu feliciter congregentur. Ecce nos ad vnionem vestre fraterne fidei secundum desiderium vestrum cum omni successione congregacionis nostre fauorabiliter ac benignissime adunati iuxta salubrem aliorum ordinum consuetudinem damus vobis cunctisque vestris successoribus humiliter et deuote tam in vita quam in morte participacionem plenariam omnium piarum accionum quas per nos ex nunc in antea operata fuerit clemencia saluatoris. Ad hoc nichilominus vobis astringi volentes. ut si quis confratrum vestrorum fraterni amoris gracia uel alio quocunque casu Ecclesiam nostram visitare voluerit, in infirmitorio sev alias vbi Prelato placuerit se recipere debeat. prebendam ibidem que nostris fratribus ministrari solet, integraliter percepturus. nisi forte ipse Prelatus hospitalitatis gracia vberiora sibi karitatis beneficia in mensa propria voluerit exhibere. Statuimus eciam vt cum aliquis vestri consortii vocante domino decesserit sacerdotum. Camerarius ibidem vel alter habens ordinare de uestibus mortuorum. diem obitus eiusdem nostro Monasterio precio bajoli de vestibus ipsius defuncti recepto per literas debeat intimare. Prepositus vero vel Decanus audito obitu fratris defuncti mane Capitulum conuocabit. et lecta litera coram eis vniuersi Capitulares pro absolucione eiusdem fratris disciplinam recipiant corporalem dicendo interim illos psalmos, qui pro nostris fratribus et benefactoribus defunctis dici in Capitulo consueuerunt. Qui autem Capitulares non fuerint siue Clerici fuerint uel Conuersi de manu Decani finito Capitulo similem recipiant disciplinam. Quo facto ipse Decanus nomen defuncti statim ascribi faciat libro mortuorum. In eadem eciam nocte si festum non impediat majores vigilie cum sollempni compulsacione cantentur et missa in mane pro defunctis sollempniter celebretur. Singulis eciam sacerdotibus missas nichilominus legentibus in sequestro. Quod si forte aliquem eodem die ex casu abstinere contigerit, die, que proxime sibi vacauerit supplere tenebitur quod neglexit. Si autem festum aliquod interueniens in ipsa nocte qua obitus defuncti nunciatus fuerit vigilias impediat siue missam. fiat nocte que vacauerit proximo subsequente. Infra cuius eciam tricennarium quilibet sacerdotum tres missas pro defunctis tenebitur celebrare. Alii vero sacerdotii karacterem non habentes vnum legant psalterium. Conuersi autem et sorores Trecenta dicant Pater noster, salutacionem beate virginis cuilibet adiungentes. Item si aliquis fratrum vestrorum infra sacerdocium constitutus aut certe. conuersus vel soror viam vniuerse carnis fuerit ingressus, nunciato nobis eiusdem obitu quinque Psalmi consueti cum Collecta speciali pro requie ipsius in Capitulo sunt dicendi. fiatque eadem nocte in vigiliis et mane in missa ipsius commemoracio specialis. Sacerdotum autem quilibet unam infra ebdomadem proximam nisi legittime impeditus fuerit, legat missam. Alii uero infra sacerdocium existentes pro eodem legant vigilias. Conuersi vero et sorores adiuncta salutacione beate virginis Centum dicant Pater noster. Fratres eciam nostros et benefactores defunctos tam salubris gracia statuti nolentes excludere, missam unam defunctorum premissis majoribus vigiliis cum sollempni compulsacione pro omnibus eisdem in vigilia beati Andree Apostoli statuimus annis singulis celebranda. In quo eciam die vbi videlicet fieri solet memoria mortuorum. kalendario ascribi fecimus annuatim in Capitulo pronunciandum. Commemoracio fundatorum et benefactorum, confratrum et sororum nostrarum et de collegio Ecclesie sancti Georii in Hertzogenburga defunctorum. eodem die quilibet sacerdotum dicat unam missam. Qui uero eadem die aliqua legitima causa prepediente celebrare non poterit, ie precedente vel subsequente celebret eandem missam. Quilibet autem dyaconorum. subdyaconorum. acolitorum vnum legat Psalterium. Quilibet Conuersorum et quelibet sororum dicat Centum Pater noster et Centum Ave Maria pro eorum requie defunctorum. Verum cum et nos adhuc in carne viuentes diuine bonitatis misericordia simus egentes. vt status nostrarum Ecclesiarum tam in rebus quam eciam in personis saluus et incolomis deoque placitus perseueret. Placuit nobis ut quilibet sacerdos nostrorum Conuentuum tres missas vnam de sancta Trinitate alteram de beata Virgine terciam de omnibus Sanctis, ita, ut Collecta hec: Deus qui karitatis dona, prime semper collecte sub vna conclusione iungatur, infra Adventum domini deuote et inpretermisse perpetuo debeat celebrare. Constituti uero infra sacerdocium vnum legant Psalterium. Conuersi quoque et sorores per singulas Ebdomades Adventus domini cum salutacione beate Virginis dicant centies Pater noster. Et ne quispiam nobis succedencium de ignorancia huius religiosi uoti valeat excusari. ipsam formam compromisse fraternitatis libro regule annotari fecimus omni anno in die que Vigiliam Sancti Andree precedit in nostris Capitulis pro leccione regule recitanda. Nichilominus hoc addentes quod si quis de nostris consorciis ductus desidia huius laboris socius existere noluerit, sit eciam a gracia que sequitur penitus alienus sic ut nomen eiusdem alteri Monasterio cum obierit non scribatur, sed proprie Ecclesie suffragiis tantummodo sit contentus. Acta sunt hec in Sancto Ypolito Anno domini M°. CC°C. XXXV°II. Pridie Nonas April. in die Sancti Ambrosii Episcopi et Confessoris.

Source Fulltext: FAIGL, Herzogenburg (Wien 1886) S. 144-147