Ich Hertweich der Lochler vnd ich Ofmey sein hausfrowe von Mvrresteten veriehen vnd tven chvnt allen den die den prief ansehent lesent. oder hornt lesen. die nu lebent vnd her noch chvnftich sint, daz wier mit verdachtem muet ze der zeit do wier iz wol getuen mochten. mit guetem willen vnd gvnst aller vnserr eriben verchauffet haben vnsers rechten vnd vrein aygens fvnf Schillinge Geltes vnd fvnf phenning wienner gemainer Mvnizz der man dient an sand Michels tag aecht vnd svbenzig phenning, vnd an sand Georigen tag svben vnd svbenzig phenning die da liegent ze Henigeinsteten auf einem halben Lehen ze dorffe vnd ze velde mit allen dem Nvtze vnd Recht als wier sev in aygens gewer her pracht haben. Vmb aecht phvnt phenning wienner gemainer mvnizz der wir recht vnd redleich gewert sein, hern Chvenraten dem Zvchswert Chorherre ze Herzogenbuerch die er gechauffet hat vmb sein phenning. die er versport hat von seiner Phruent vnd die selben Gvlt gestiftet zve einem ewigen Liecht daz pei dem tag prinnen schol an vnderlaz vor vnser Vrowen Alter in dem vorgenanten Gotshavs. Vnd daz selb guet geb wier in ledichleichen vnd freyleich ze haben vnd allen iren frumen da mit ze schaffen als mit anderm ierm Aygen. an allen ierresal. Vnd dar vber durich pezzerr sicherhait willen. so setze wier vns ich vorgenanter Hertweich der Lochler vnd ich Ofmey sein hausfrowe vnverschaidenleich mit vnsern paider eriben vber die vorgenanten gult hern Chvnraten dem vor genanten Chorherren ze Hertzogenbuerch vnd sand Georigen gotshaus ze Hertzogenbuerch ze rechtem scherm vnd gewer fuer alle ansprach, als aygens recht ist vnd des Landes ze Osterrich. . . . Vnd daz die red stet vnd vnzebrochen beleib, dar vber geb wier in Ich Hertweich der Lochler vnd ich Ofmei sein Hausfrow den prief zv einem offen vrchvnd diser sache. versigelten vnd bestett mit vnserm Insigel. vnd mit Goetfrides Insigel von Ainoed vnd mit Wolfgers Insigel von Wielandestal. die diser sache gezeuge sint mit iern Insigeln. vnd ander frum levt genueg den dev sache wol chvnt ist. Der prief ist gegeben ze Hertzogenbuerch in dem Chloster da von Christes gepurde warn ergangen Drevzehen hundert jar. dar nach in dem Nevn vnd Dreizgisten jar an sand Gregori tag in der Vasten.

Source Fulltext: FAIGL, Herzogenburg (Wien 1886) S. 151-152