Ich lordan vnd ich Mert sein Pru^eder, Otten sv^en dez tzehentnaer datz Ragtz veriehen vnd tvn chvnt allen den die disen prief sehent oder ho^erent lesen Daz wier ain ansprach haben gehabt gegen dem zehenthof ze Raktz vnd allen den zehenten dev von alter dar in geho^erent des Heyligen herren sand Goerigen gotzhaus ze Hertzogenburch. Di selben ansprach vnd di recht di wier dar an scholten gehabt haben, di hab wier vnuerschaidenleich vnd aller sacch gesatzt an den erbarn herren hern Weychart von Winchel, also beschaidenlich, waz der dar vmb spraech zwischen vns vnd dem vorgenanten Gotzhaus vmb alle sach daz scholt wier staet haben. Do sprach der vorgenant herr her Weychart von Winchel daz wier vorgenant zwen pruder ich lordan vnd ich Mert zv dem ersten auf gaben dem erbern herren Probst Seyfrid alle di ansprach vnd di recht der wier iahen an dem vorgenanten zehenthof vnd den zehent di von alter dor in geho^erent. do gab ich vorgenanter lordan auf dem erbern herren Probst Seyfrid mein tayl vnd alle di ansprach di ich het hintz dem vorgenanten zehenthof vnd ich Mert gab auf dem vorgenanten Probst Seyfrid mein tayl vnd meines pruder hern Chvnratz tayl dez pharrer datz Eybenstayn der mier seinen tayl het aufgegeben ledichleich vor dem erbern herren hern Weychart von Winchel vnd vor andern erbarn leuten also beschaidenlich daz wier hin fur ebichleich dhain chrieg noch dhain ansprach noch dhain recht gegen dem vorgenanten zehenthof vnd zehent, di dor in geho^erent nicht haben noch su^echen schullen. Vnd daz dem Gotzhaus vnd der samnung dez heyligen herren sand Go^erigen datz Hertzogenburch disev red staet vnd vnzeprochen beleib daz lob wier mit vnsern trewen vnd wann wier aigens insigel nicht haben wier vorgenant lordan vnd Mert so verpinten wier vns vnder vnsers genaedigen herren hern Weychart von Winchel insigel der diser sach vertaydinger zwischen vnser gebesen ist, sta^et vnd vnzeprochen behalten als vor verschriben ist. vnd dar vber zv einer pezzern sicherhait sint der sacch gezeug der erbar man Gotfrid der Plespergaer mit seinem anhangunden insigel vnd ander erber leut genu^eg den di sacch wol chunt ist. Der prief ist gegeben do man zalt von Christi gepurd drevzehen hundert dar nach in dem secchs vnd vierczgisten iar an sand Oswaldi tag.

Source Fulltext: FAIGL, Herzogenburg (Wien 1886) S. 184-185