Ich Dyetel der Sybenhierter vnd alle mein erben, wier vergehen offenlichen an dem Brief, vnd tuen chunt allen den. die in sehent oder horent lesen. die nv sint vnd hernach chvmftig werdent. Daz ich mich mit wolverdachtem muet vnd nach rat aller meiner pesten vrevnde. aller der ansprach vnd aller der recht der ich iach. vnd dev ich scholt haben, an dem Hof datz Etzlesperg. vnd an alle dev vnd dar zv gehort, swie daz genant ist. der dez gotzhaus Sand Gorgen ze Hertzogenburch rechtes aygen ist. der selben recht aller han ich mich gaenczlich recht vnd redlich verczigen mit guetleichem willen vnd pin derselben egenanten ansprach aller willichlichen aller sach gegangen hinder den erbern geystlichen Herren. Probst Seyfriden. zv den zeiten Probst des vorbenanten gotzhaus ze Hertzogenburch. also daz er sich dar vm ervarn schol an meynn vrevnden. vnd an den vmmesaetzen waz er dar nach danne taet dez vil oder wenig waer oder gar nichtes ist. dez schol mich allez wol genuegen. vnd schol auch ich hinfuer ewichlichen chain ansprach auf den vorbenanten hof datz Aetzelsperg nicht habn. Daz lob ich allez staet ze habn mit meinen trewen an aydes stat. vnd gib im dar vm den Brief zv aim offenn sichtigen vrchvnd besigelten mit meym anhangunden Insigel. Vnd zv ainer pezzern sicherhait han ich gepeten meynn Herren zv der zeyt. Hern Vlreychen den Strevnn. der der sache vertaydinger gewesen ist vnd meynn O^ehemen Hainreichen den Olachter vnd Otten sein svn, daz si der sach getzevg sint mit iern anhangunden Insigeln. Gegebn nach Christi gepuerd dreytzehen Hvndert jar dar nach in dem Nevn vnd viertzigisten Jar. des naesten Phinstages nach vnser vrowen Tag zv der Liechtmesse.

Source Fulltext: FAIGL, Herzogenburg (Wien 1886) S. 191-192