Ich cholman von Ramsenpach vnd ich Katrei sein hausvraw vnd vnser paider erben wier veriehen Offenleich an disem prief daz wier gegeben haben vnsers rechten aigens hern Gorigen van goetzesdorf vnd seinen erben ein lechen dacz Oberndorf daz do leit zue negst ob dez marchtz zee herczogenbu^erch mit alle dew vnd dar zcu^e gehort cze veld cze dorf gestift oder vngestift wie daz genant ist dar vmb hat er vns gegebn zcue einem wider wegsel ein drittail an dem obernhoff vnd ein drittail auz der hofstat do pey dew do ligent pey dem haus cze Ramsenpach sew schullen auch in dem vorgenanten lechen als var geschriben stet all iern frum mit schaffen cze verchauffen vnd cze verseczen als mit anderm ierem aigem wier schullen auch dez vargenanten lechens dacz Oberndorf hern Gorigen vnd seinen erben ier scherm vnd ier gewer sein fu^er all ansprach als aigens recht ist in dem lant zce Osterreich. Daz dew red stet vnd vnczebrochen peleib dor vber gib ich var genanter Cholman von Ramsenpach in disen prief versigelt mit meinem anhangunden Insigel. Der sach ist gezceug wolfger der rechelsperger vnd Chunrat der freutzhauser (sic) mit ier paider anhangunden Insigeln. Der prief ist gegeben do man zcalt van Christes gepu^erd vber dreuczehen hundert Jar dar nach in dem fumfczkistem Jar an sand Stephans tag zce phingsten.

Source Fulltext: FAIGL, Herzogenburg (Wien 1886) S. 193