Ich Wernhart von Nuzdorf vnd mein hausfraw vnd all vnser Erben veriehen vnd tv^en chunt alle den di disen prief lesent sehent oder ho^erent lesen. Daz ich mit guetem willen vnd mit gunst meiner erben verchauft han Siben Schilling phenning geltz. vnd zehen phenning geltz. der selben gult sind gelegen ze Nuzdorf hinter dem haus auf einem viertael eins weingarten sechz emmer weins oder ein halbez phunt phenning daz mein vreyes aygen ist gewesen. vnd zehen vnd drey schilling phenning geltz wienner munizz. di do gelegen sind pey der hor prukk auf chraut gerten daz mein rechtz purchrecht ist gewesen, vnd ist auch her cho^emen von meinem vater hern Wernharten dem Got genad. von dem ich alle ierichleich gedient han vier phenning in den Pruelhof. di vorgeschriben gult han ich verchauft dem Erbern man hern Joerigen ze den Zeiten pharrer ze Nuzdorf vnd Sand Johans Gotshaus vm aindlef phunt phenning wienner munizz. der ich gentzleich gewert pin mit alle dem nucz vnd mit alle den rechten vnd ich iz vnd mein vodern haben gehabt daz er alle seinen frum domit schaffen schol an allen chrieg vnd an alle irrung. vnd pin auch ich vnd alle mein erben der egenanten gult des pharrer von Nuzdorf vnd seins Gotzhaus rechter scherm vnd gwer fur alle ansprach. .. . daz lob ich im mit meinen trewn. allez stet vnd vnczebrochen behalten vnd dor vber ze einer pezzern sicherhait gib ich im disen prief versigelt mit meinem aygen anhangunden insigel. vnd sind gezeug Chv^enrat von frewntzhausen. Wolfker der Reicholzperger. Pilgreim der flemminch mit ir aller insigel. vnd sind auch di vorgenanten aindlef phunt her cho^emen von hern Wernharten dem Got genad. Der prief ist geben noch Christi gepu^erd vber drevczehen hundert iar. dor nach in dem newn vnd vierczgisten iar an sand Agnesen tag.

Source Fulltext: FAIGL, Herzogenburg (Wien 1886) S. 189-190