Ich Wernhart von Nuzdorf vnd mein hausfraw vnd all vnser Erben veriehen vnd tu^en chunt alle den di disen prief lesent sehent oder ho^erent lesen, daz ich mit verdochtem mu^et und mit gutem willen aller meiner erben verchauft han sibenczehen schilling phennig geltz dev do gelegen sind datz dem Wueningz dev mein mu^eter fraw Agnes geschaft het dem Gotzhaus ze Nuzdorf dez gu^eten herren sand Johans. daz man ir alle ierichleich an irem iartag scholt chauffen vier phunt prat vm zway phunt phenning alz ier gescheft prief sagt. wider dev vorgenanten gult han ich geben sand Johans Gotzhaus ze nuzdorf oder wer pharrer do ist. ander sibenzehen schilling phenning geltz dev do gelegen sind ze nuzdorf auf zwayn holden. auf Alpharten dem schuester vnd auf Otten in dem Newn haus, daz mein vreyez aygen ist gewesen, mit alle den nuczen vnd mit alle dem rechten vnd ichz vnd mein vodern her haben pracht. also beschaidenleich. wer dez Gotzhaus phleger oder pharrer ist ze nuzdorf daz er alle sein frum mit den holden schol schaffen an all ierrung. vnd schol auch allez daz von der vorgenanten gult pegen, daz der alt gescheft prief sagt. wer aber daz im abgieng an der egenanten gult von welicher lay sachen sich daz vuegt so schol er mit andern vbrigen wandeln noch vnserm rat. vnd schol auch ich der vorgenant wernhart vnd all mein erben dez selben gu^etez dez pharrer von Nuzdorf vogt sein vnd rechter scherm fur all ansprach an gfer. vnd an dez pharrer schaden von Nuzdorf vnd schullen auch mir di vorgenanten holden alle ierichleich dienen zway vogt huener oder zwen phenning vur ein huen. vnd lob auch ich mit meinen trewen allez daz staet vnd vnzebrochen behalden waz vor geschriben stet an disem prief. vnd dar vber gib ich vorgenanter wernhart dem pharrer von Nuzdorf vnd dem Gotzhaus disen prief versiglt mit meinem aygen anhangundn insigl. vnd sind der sach zeug Chu^enrad von freuntzhausen. Pilgreim der fleminch. Wolfker der Reicholzperger mit ier aller insigl. Der prief ist geben nach Christi gepu^erd vber drevzehen hundert iar dar nach in dem Newn vnd vierczgisten Jar an sand Agnesen tag.

Source Fulltext: FAIGL, Herzogenburg (Wien 1886) S. 190-191