Ich Andre vnd Ich fridreich vnd Ich Ians vnd Ich Rudolf der Junger die pru^eder von Liechtenstayn vnd vnser erben. Wier veriehen vnd tuen chvnt allen den di disen brief lesent oder ho^ernt lesen di nv lebent oder her nach chv^emftig sint. daz wier mit vnser erben gueten willn vnd gunst, mit verdachtem muet vnd mit gesampter hant vnd ze der zeit do wier iz wol getuen mochten verchauft haben vnsers rechten vreyn aigens vnsern Marckt der da haizt datz Sand loergen pei der Tunawe vnd daz marktrecht mit gericht vnd mit zo^elln vnd daz Vrfar da selbest vnd allez daz, daz wier vnd vnser vordern gehabt habn nyederthalb Chagran gegen der Tunawe vnd zuischen der Hochwierdign fuersten guet des Pischolfs von Saltzburg an eym ort vnd des Pischolfs von freysingen an dem andren ort, iz sei Holtz Wisemat Waid oder Vischwaid ze Veld oder ze Dorf gestift oder vngestift versuecht oder vnversuecht swi so daz gnant ist. Den vorgnanten Marckt ze Sand Io^ergen, marchtrecht, gericht, zo^ell vnd daz Vrfar vnd allez daz daz dar zv^e geho^ert vnd als iz vorgeschribn stet hab wier vorgnant Ich Andre vnd ich fridreich vnd ich Ians vnd ich Rudolf der Junger di pru^eder von Lyechtenstayn recht vnd redleich vercauft vnd gebn mit all den nutzen vnd rechten als wir iz vnd vnser vodern in nutz vnd gewer her pracht habn vmb zuai hundert phunt, vnd vmb sybn vnd achczig phvnt wienner phennig der wier gar vnd gaentzleich gericht vnd gewert sein den erbern geistleichen herrn Probst Seyfridn ze den zeiten Probst Sand loergen Gotshaus ze Herzogenburch vnd allem Couent gemaynchleichen da selbest, fu^erbaz ledichleich vnd vreileichen ze habn vnd alln iern frum da mit ze schaffen, mit verchaufen versetzen vnd gebn swem si welln an alln irsal. Vnd durch pezzer Sycherhait so setzen wier vns Ich vorgenanter Andre vnd Ich fridreich vnd Ich Jans vnd Ich Rudolf der Junger di Pru^eder von Lyechtenstayn vnd vnser erben vnverschaidenleich v^eber den vorgenanten Marckt, vnd v^eber allez daz als vorgeschribn stet, dem vorgnanten herrn dem Probst vnd dem Couent gemaynchleich des vorgenanten Sand lo^ergen Gotshaus ze Herzogenburch ze rechtem scherm vnd gewern vor alle ansprach als aygens recht ist vnd des lands recht ze Oesterreich. Wer aver daz daz si an dem vorgnanten Marckt marktrecht gericht zo^ell vnd vrfar oder an alle dev als iz vor geschribn stet, icht chriegs oder ansprach gewunnen oder daz in dar an icht abgieng mit recht swaz si des schaden nement daz schull wier in allez auzrichten vnd wider chern an all ier mu^e vnd an alln iern schaden, vnd schulln auch si daz haben auf vns vnd auf vnsern erben vnuerschaidenleichen vnd auf allem vnserm guet daz wier habn in dem land ze O^esterreich vnd ze Steyr wier seyn lebntig oder toed. Vnd daz diser chauf also fu^erbaz staet vnd vnczprochen weleib dar vmb so gebn wier vorgnant pru^eder von Lyechtenstayn dem vorgnanten herren Probst Seyfrid vnd dem Couent gemaynchleich des vorgnanten Sand lo^ergen Gotshaus ze Herzogenburch disen brief ze aym warn sychtigen vrchv^end vnd ze ayner ewigen vestiung diser sach, versigelt mit v^ensern anhangenden Insigeln, vnd mit vnserer prueder des Eltern Hern Rudolfs vnd hern Otten vnd mit vnsers Svagers hern fridreichs von Stubenberg Insigel di diser sach gezeug sint mit irn Insigeln. Diser brief ist gebn nach Christes gebuert v^eber drevzehen hvndert iar dar nach in dem drev vnd fv^emfczkistem iar an Sand Gregorgen tag.

Source Fulltext: FAIGL, Herzogenburg (Wien 1886) S. 207-209