Ich Wildung von Wildungsmavr vergich vnd tuen chunt offenwar mit disem brief Allen den die in lesent sehent oder horent lesen die nv lebent vnd hernach chumftich werdent. Daz ich durch got vnd durch hail meiner vnd aller meiner vodern vnd nachchomen sel willen, meines rechten vreyn chauf aigens. daz ich gechauft han wider Christan den Stainer vnd wider sein erben tzehen phunt geltes. di da gelegen sint in dem Swaertzenpach in sand Veytspharr recht vnd redleich gegeben han. dem heiligen hern sand Jerigen vnd seinem Gotshaus ze Hertzenburch, also beschaidenleich. daz mein bruder her Seyfrid ze den zeiten Probst da selbst. mier vnd im vnd allen vnsern vodern vnd nach chomen ein selgeraet vnd ein ewigev gedechnvzze vnsern selen damit stiften vnd machen schol. swie iz im aller pest geualle. vnd wie in sein gewizzen ler. vnd daz daz vorgenant guet tragen mag. Wer aber daz mein vorgenant bruder her Seyfrid Probst ze Hertzenburch sturb vnd daz vorgenant selgeraet nicht ausrichtiet. weder bei seinem leben nach mit geschaeft nach seinem tod. so schullen di vorgenanten tzehen phunt geltes des egenanten sand lerigen Gotshaus sein in allen den nvtzzen vnd rechten vnd wir iz vnd vnser gewaer her pracht vnd gehabt haben. Also daz man den hern vnd den vrawen ir phreunt (sic) dester vollichleicher gegeben mug. vnd auch daz wir thailheftig werden alles irs gepet. vnd auch ander christenleut gepet daz da geschiecht pei tag oder pei nacht. in dem vorgenanten Sand Jerigen Gotshaus hin fu^er ewichleichen. Vnd daz di vorgeschriben sach vnd wandlung furbas also stet, gantz. vnd vnzebrochen beleib, dar vber so gib ich vorgenanter Wildung von Wildungsmavr. dem vorgenanten Sand lerigen Gotshaus disen prief versigelten mit meinem anhangvnden Insigel. vnd ze einer pezzern sicherhait. mit meines bruder hern Nyclas Insigel. ze den zeiten maister ze Mavrperg. vnd mit meines bruder Jansn Insigel. vnd mit hern fridreichs Insigel des Atzenprukker. dev all der vorgenanten sach vnd wandlung zewg sint mit irn anhangunden Insigeln. Der prief ist geben nach Christes gepurd dreutzehen hundert iar dar nach in dem drev vnd funczigistem Jar. an dem Percht tag.

Source Fulltext: FAIGL, Herzogenburg (Wien 1886) S. 206-207