Ich Jorg von Goetzesdorf vnd sein Hausvraw Margret vnd vnser paider erben. Wir veriehen offenleich an disem prief vnd tv^en chunt alln den. di in sehent, lesent oder ho^ernt lesen, di nv sint oder hernach chvnftig werden. Daz wir mit wol verdachtem mv^et vnd mit gesamter hant. zder zeit vnd wier ez wol getv^en mochten verchauft haben vnsers rechten freigen aigens daz wier gechauft haben von dem erbern man hern Otten von Ruchendorf vnd Nyclasen seim svn sechs schilling gelts wienner phennig di gelegen sint auf eim lehen dacz Merteinsprvnn. vmb Sybenthalb phunt gemainer wienner phennig der wir gar vnd gaentzleichen verricht vnd gewert sein dem erwirdigen gaistleichen herren Probst Seyfridn ze Herczogenbuerch vnd seim Gotshaus. fu^erbaz ledichleich vnd vreileich ze haben vnd alln irn frum da mit schaffen. mit verchauffen mit versetzen geben wem si wellen. an alln irsal. Vnd waz der vorgenant her probst Seyfrid oder sein Gotshaus an den vorgenanten sechs schillingen gelts mit recht chriegs oder ansprach gewunn. welchen schaden se des nemen den schull wier in richtig machen vnd wider chern an allen chrieg. vnd schulln auch se daz haben auf allem vnserm guet daz wier haben in dem land ze Oesterreich, wier sein lebentig oder tod. Daz diser chauf fu^erbaz stet vnd vnczeprochn beleib, dar vber gib ich im disen offen prief zv eim waren v^erchunt diser sache versigelt mit meim anhangundem Insigel. Der sache sint geczeug der erber Ritter her Chuenrat von freunshausen vnd Wolfker der Reichersperger. Der prief ist gebn do von Gots gepu^erd geczalt wart. Drevczehen Hvndert Jar dar nach in dem vier vnd funfzkistem Jar. am palben tag.

Source Fulltext: FAIGL, Herzogenburg (Wien 1886) S. 210-211