Ich Chuenrat von Tiernstain. vnd ich Katrey sein Hausvraw vnd vnser paeder erben. wier vergehen offenleich an disem prief vnd tv^en chunt allen den di in sehent lesent oder ho^ernt lesen, di nv sint oder hernach chvnftich werden, daz wier mit vnserr erben guetem willen vnd gunst mit verdachtem mvet vnd mit gesampter hant. tzv der zeit do wier ez wol getv^en mochten, verchauft haben vnsers rechten frein chaufaigens. den Drittail von der Hofmarch zce Wielanstal da zv den zeiten der Tvern auf gelegen ist. daz ich eemaln gechauft han von hern Cholman von Ramsenpach vnd vrawn Katreyn seiner Hausvrawen. vnd Albrantn seim svn. Daz di selben vrawn Katreyn von ierm vater an erstarben ist. vnd zv ierm erbtail an gevallen ist. daz si mit rechter fv^erczicht getailt hat von andern iern geswistroden vnd als wier ez in nvcz vnd in gewer her pracht haben, also hab wier ez geben ze veld ze darf versuecht vnd vnversuecht gestift oder vngestift oder wie so daz genant ist. vmb Hvndert phunt vnd vier phvnt gemainer wienner phennig der wier recht vnd redleich vericht vnd gewert sein. dem erbern geistleichem herren probst Seyfriden ze Hercogenbuerch vnd seim Gotshaus.fùrbaz ledichleich vnd vreileich inne zehaben. vnd allen ieren frum da mit ze schaffen. verchauffen. versetzen. geben wem se wellen an allen iersal. Vnd dar vber ze einer pezzern sicherhait so setzt wier vns ich vorgenanter Chu^enrat von Tiernstain. vnd ich vraw Katrei sein Hausvraw fu^er vns vnd fu^er alle vnser erben v^eber daz vorgenant guet dem eegenanten hern Seyfriden probst ze Herczogenburch vnd seim Gotshaus ze rechtem scherm vnd gewer fu^er alle ansprach als aigens recht ist in dem land ze Oesterreich. Wer auer daz daz der vorgenant. her Seyfrid probst ze Herczogenburch vnd sein Gotshaus mit recht dhain schaden nemen. den schull wier in allen ab legen. vnd wider ehern, vnd schulln den haben auf vns vnd auf alle dem vnd wier haben vnd lazzen in dem Land ze Ostereich. wier sein lebentig oder tod. Daz dise sache stet vntzebrochen beleib dar vber gib ich vor genanter Chu^enrat von Tiernstain dem eegenanten hern Seyfriden probst ze Herczogenburch vnd seim Gotshaus disen prief versigelt mit meim anhangvndem Insigel. vnd mit meiner vettern. Marchwarts vnd Reinprecht von Tiernstain. vnd meiner Oehem Oswalts vnd Chuenrats von Ladendorf. vnd mit hern fridreichs von Atzenpruk anhangunden Insigeln. di diser sache geczeugen sint. Der prief ist geben nach Christes gepurd Dreutzehen hundert Jar. dar nach im vier vnd fvnfkistem Jar. an sand Affren tag.

Source Fulltext: FAIGL, Herzogenburg (Wien 1886) S. 213-214