Ich Katrei von Tiernstain vergich offenbar mit vrchunt des Priefs allen den di in sehent oder ho^ernt lesen. vm den Drittail der Hofmarch ze Wielanstal. do zv den zeiten der Tvrn auf gelegen ist. vnd vm allez daz dar zve geho^ert. daz mein wiert Chunrat von Tiernstain verchauft hat. daz daz geschehen ist mit meim guetleichen willen, vnd auch ich dar an chain recht nicht enhan. weder von meiner morgengab wegen. noch von mein selbs guets wegen, noch von chainer ander lay sache wegen. Vnd des zv vrchunt vnd zv einer pezzern sicherhait gib ich vorgenante Katrei von Tiernstain disen prief versigelten mit meim anhangvndem Insigel. vnd mit des hochwirdigem vnd meins genedigen herren Graf Vlreichs von Phannwerch zv den zeiten Marschalh in Ostereich vnd Hauptman in Chernten anhangvndem Insigel. der diser sach geczevg ist. im an schaden. Der prief ist geben nach Christes gepu^erd. Dreuczehenhundert Iar dar nach im vier vnd funfczkistem Iar. an sand Affern tag.

Source Fulltext: FAIGL, Herzogenburg (Wien 1886) S. 215