Ich vlreich der fleschacher vnd ich goecz der fleschacher purger ze Drozendarf. vnd vnser Hausfraun vnd all vnser Erben, veriehen vnd tun chunt alle den di disen prief sehent oder ho^erent lesen. daz wier gechauft habn ein halben hof zu zistestorf. wider Niclin de Richterin van Drozendarf. Mit dez erbern heren willn. Hern Seyfricz. Probst ze Herczogenwuerch. vnd der Samnung dez selben goczhaus. Mit alle den zehenden halben. di van alter dar In geho^ert habent. Daz ist zu zistesdarf. vingendarf zedlcz Wolframsdarf. chalsenreut. prosmareut. phaffendarf. lenstain hie dis halb der they. vnd waz wier zehent van den var genantn do^erffern haben, di dar zu^e geho^ernt in drozendarffer, phar. vnd di habent vns di var genantn heren alle verliehen vnd vnsern erben. mit alle den rechten vnd hernach geschriben stet. Also beschaidenleich. Daz wier oder vnser erben alle iar chomen schulln zu ier stiftung. vnd schullen da van In di vargenanten zehent besten. Dar nach vnd Is got geit. vnd besehen wiert auf dem veld. vnd wie wier di var genanten zehent van in besten dez schul wier seu weren ze rechten tegen. Wier schullen auch oder vnser erben Mit der erbern heren willen. ain man auf dem hof haben. oder selb darauf siczen, vnd wan wier oder vnser erben saumig weren an den var geschriben sachen. oder an dem dienst der van alter auf dem hof gewesen ist. Da mit so wer wier geuallen van alle den rechten di wier an dem vargenanten hof vnd zehenden hieten recht als wier tat weren. Daz di red furbaz stet vnd vnczebrochen beleib. wan wier nicht aigner insigel haben. hab wier gepeten den erbern man Herman Gremleichen. vnd fridreichn den zobl van Sighartzreut. Daz di der sach zeug sein mit ieren anhangunden insigeln. Der prief ist geben nach christs gepurt dreuczehen hundert iar. dar nach in dem funf vnd fu^enczigisten iar a Sand vlreichs tag.

Source Fulltext: FAIGL, Herzogenburg (Wien 1886) S. 216-217