Ich Georig Georigen aydem pei dem Tor vnd ich Hainreich der alt Staindel veriehen vnd tv^en chvnd mit disem prief allen lavten daz ein chrieg waz zwyschen vns an ainem tail an der dreier chind stat vnd worten Mychels Petreins svn des chastner vnd Chvnigvnten mein Georigen Tochter vnd Katrein mein Hainreichs Enynchel vnd sind allev drev rechtev Enynchel Ruegers des Hverneins puriger ze Nevnburch Marchthalben dem got genad. vnd an dem andern tail zwyschen Georigen dem Veczen vnd wrowen Gedravten seiner Havswrowen des egenanten Ru^egers Tochter vm allev di gveter purchrecht vnd perchrecht vnd varvnd gv^eter di Nycles Ruegers svn des Hv^erneins dem auch got genad hinder im lyezz des ain halbz Haus ist gelegen an dem Neysydel ze nast der Grasmvglerin da auf leit ein halb phunt phennig geltes vnd sind drittalb Rachen Weingarten gelegen in dem Weingraben ze nast dem pfendlein vnd vm syben phunt geltes vnd vm ander varvnd gv^et da wier den egenanten drin chinden rechtes dar an jachen ze haben mit sampt ierr Mu^einen Gedravten Nyclos swester vnd vorderten auch der selben gveter aller ein gewer von den amptlavten alz verr daz Georig der v^ecz an seiner Hauswrowen stat vnd worten di gewer verantwu^ert vnd rechten alz lang mit einander daz wier ze paiden tailn mit mv^et willen vngeno^ett des selben chriegs rechts vnd ansprach gegangen sein mit fu^erzicht hinder di vier erber mann Ortolfen den Tvczen Sluzler di zeit vnd Vlreichen den Scho^enherren des rats ainer vnd fridreichen am Ort auch des Rats ainer di zeit vnd Albrecht der vogel der genanten ainer di zeit vnd waz di vier spraechen daz solt stet sein. Vnd di habent nach iern trevn dar vber gesprochen alz sev daz ein recht daucht sein also daz den vorgeenanten drin chinden beschaiden ist daz egenant halb haus vnd fumf phunt wienner phennig beraiter fu^er daz halb phunt geltes der wier gewert sein. So ist beschaiden Georigen dem Vczen vnd Gedravten seiner Hauswrowen di egenanten dritthalben Rachen Weingarten in dem Weingraben vnd die syben phunt geltes vnd als varvnd gv^et dar zu^e da sev von geben sullen ain phunt geltes in di Oblai ze einem ewigen iartag dem oft genanten Nyclosen vnd sol dar zu^e allez daz gelt gelten daz der selb Nyclos gelten sol. Iz mag auch ver Gedravt di V^eczin mit ierm beschaiden gv^etern fu^erbaz allen irn frvm damit geschaffen mit verchauffen mit versetzen vnd geben swem iz wil an allen chrieg vnd ierrsal vnd sullen ze paiden tailn ains daz ander dar an nicht irren mit worten nach mit werichen. vnd geben in dez ze einem woren vrchvnd disen brief versygelten mit der erbern zwair schydmann Insygel Ortolfs des Tuczen Sluzler di zeit vnd Vlreichs des Scho^en Herren des wier sev gepeten haben wand di andern zwen schydmann nicht aygen insygel habent fridreich am Ort vnd Albrecht der vogell. Der prief ist geben nach Christ gepv^erd drevzehen hundert iar dar nach in dem fumf vnd fumfczigistem iar an Sand Merten Tag.

Source Fulltext: FAIGL, Herzogenburg (Wien 1886) S. 218-219