Ich Ott der Grilnperiger von prunn vnd mein Hausvrow vnd alle mein eriben. Wier veriehen offenbar mit dem prief allen den laeuten die in sechent oder ho^ernt lesen die nu sind vnd hernach Chv^emftig werden. Daz wier mit guetem willen vnd gunst aller vnser pesten vreunt vnd eriben ze den zeiten do wier is wol getuen machten Recht vnd redleich vnderwvnden haben ains achkers der do gelegen ist vnder dem Cherspaevm dacz Gereisdorff. also beschaidenleichen daz ich vorgnanter Ott vnd mein eriben oder wer denn vorgenanten achker nach vns in hat alle jar jaerichleich mein Herren Sant Jacoben der Rast dacz prvn in dem choczhaus alle jar dien dreyzzig pfennig an Sand Cholmans Tag vnd die selben dreyzzig pfennig zv einem Ewigen Liecht geho^ernt in dem vorgnanten goczhaus hintz prvn vnd auch von petrein dem pherlein her sind chomen vnd wann sew irs versezzen dienstz nicht lenger wellent paeyten so schulln sew vns notten swer den prief (hat) vnd pfenten mit vnserm guetleichen willen mit dem vorgnanten achker an fu^erbot vnd an chlag vnd an alz recht vnd schulln sew des fu^erbaz vngolden sein von allen laeuten. wier schullen auch den vorgnanten achker nicht paulas lazzen werden, daz lob wier in allz ze Laysten vnd staet behalten mit vnsern trewn an aydes stat. Vnd daz in vorbaz disew Red staet vnd vnczebrochen beleib. Des gib Ich in vorgnanter Ott der Grilnperiger denn prief versigelten mit meinem anhangunden Insigell vnd mit Riepplein Insigell mein Vetern den wier dor vm gepeten haben daz er diser sach zeug ist mit seinem Insigell im an schaden. Der prief ist Geben nach Christi gepuerd dreuczechen Hvndert Jar vnd in dem fu^emf vnd fu^emfczkisten Jar des naesten Eritags nach vnsers Hern Leychnams Tag.

Source Fulltext: FAIGL, Herzogenburg (Wien 1886) S. 215-216