Ich Jans von Wildungsmawr vergich vnd tuen chunt offenwar mit dem brief allen den di in lesent sehent oder horent lesen di nv lebent vnd her nach chunftig werdent. Daz ich durch got vnd durch hail meiner vnd aller meiner vodern vnd nachchomen sel willen. meines rechten vreyn chauf aygens. daz ich gechauft han. wider dev erbern beschaiden hern Chunraten von Vreuntzhausen. vnd Leben seinen bruder. vnd ir baider erben czehen phunt vnd zwaintzig phenning geltz. vnd dev gelegen sind in Chulber pharr ze Teufleinsdorf auf einem hof. vnd ze Haugstorf vnd in dem Graben. vnd ze Grueb auf den vier guetern. recht vnd redleich gegeben han dem heiligen hern sand Io^ergen. vnd seinem Gotshaus ze Hertzenburch also beschaidenleich. daz mein brvder her Seyfrid ze den zeiten Probst da selbst mir vnd im vnd allen vnsern vodern vnd nachchomen ein selgeret vnd ein ewigev gedechtnvzze vnsern sellen da mit stiften vnd machen schol swie im iz aller peste geualle vnd wie in sein gewizzen ler. vnd daz daz vorgenant guet tragen mag. Wer aber daz mein vorgenanter bruder her Seyfrid Probst ze Hertzenburch stu^erb vnd daz vorgenant selgeret nicht ausrichtiet weder bei seinem leben noch mit gescheft nach seinem tod so schullen di vorgenanten zehen phunt vnd zwaintzig phenning geltes des vorgenanten sand Jorgen Gotshaus sein in allen den nvtzen vnd rechten vnd wir iz vnd vnser gewer her pracht vnd gehabt haben, also daz man den hern vnd den vrawen ir phreunt dester vollichleicher gegeben mvg. vnd auch daz wir taileftig werden alles irs gepet vnd auch ander christenleut gepet. daz da geschiecht bei tag oder bei nacht in dem vorgenanten sand Jorgen Gotshaus hin fu^er ewichleichen. Vnd daz di vorgeschriben sach vnd wandlung furbas also stet vnd vnzebrochen beleib. dar vber so gib ich vorgenanter Jans von Wildungsmavr dem vorgenanten sand Io^ergen Gotshaus den brief versigeltn mit meinem anhangundem Insigel. vnd ze einer pezzern sicherhait mit meines bruder hern Nyclqas Insigel ze den zeiten maister ze Maurperig. vnd mit hern fridreichs Insigel des Atzenprukker. dev der vorgenanten sach vnd wandlung zeug sind mit irn anhangunden Insigeln. Der prief ist geben nach Christes gepurd Dreutzehen hundert Iar dar nach in dem siben vnd funftzigistem Iar. an Sand Gallen tag.

Source Fulltext: FAIGL, Herzogenburg (Wien 1886) S. 230-231