Ich her Genik von Elsarn vnd ich Katrey sein hausvrowe vnd vnser paider erben wier veriehen vnd tu^en chunt offenbar an dem prief allen leuten. Daz wier mit verdachtem muet vnd zu der zeit do wier iz wol getuen machten vnd nach vnser pesten freunt rat vnd willen haben geben vnsers rechten aygens daz mein hausvrowen vrowen Katreyn an derstarben ist von iers vater tod hern vlreichs von Elsarn vnd von ierr mueter tod vrowen Katreyn den got paiden genad vierczk phenning gelts wienner mvniz die man dient an Sand Mychels tag die do ligent datz wayzendorf auf ainer hofstat vnd ain weingarten auch do selbs daz wier in nvtz vnd in gwer gehabt haben vnd mit allen den rechten vnd nvtzen vnd wierz gehabt haben ze veld vnd ze dorf versuecht vnd vnuersuecht gestift vnd vngestift also hab wierz ledichleichen vnd inrrchleichen durich got vnd durich vnser vrowen willen vnd durich vnser sel hail willen vnd durich all vnser vodern sel willen geben vnser vrowen gotzhaus ze Salapulka in daz Pirichech. also beschaidenleich daz man ebichleichen schol piten peidem selben gotzhaus vmb vns vnd vmb all vnser vodern wier sein lemtig oder tod. Vnd sei auch wier vorgenant dez egenanten guetz recht scherm vnd gwer fuer all ansprach. Daz die red stet vnd vnzebrochen beleib dar vber so geb wier disen prief zu ainer offen vrchund vnd zu ainer sichtigen worhait vnd wan mein vorgenanteu hausvrowe vrowe Katrey aigens Insigels nicht enhat so bestet ich vorgenanter Genik den prief mit meinem aigen anhangunden Insigel. Der sach ist zeug her Hainreich von Mizzingdorf vnd Wernhart der Styreiner (sic) mit iern anhangunden Insigel. Der prief ist geben noch Christes gepu^erd Dreuzehen hundert Iar dar nach in dem Syben vnd funftzkisten Iar an sand Vlreichs tag.

Source Fulltext: FAIGL, Herzogenburg (Wien 1886) S. 227