ICH fridreich ich Ru^eger vnd ich Alollt die pru^eder die Olachter vnd vnser erben Wir vergehen vnd Tun chunt allen den die disen brief lesent oder horent lesez die nu lebent vnd hernach chumftig sint. Daz wir mit gutem willen mit verdachtem mu^et vnd nach vnser pester vrewnd rat zu der zeit do wir es wol getun mochten vnd mit vnsers Purchherren hant des erbern geistleichen herren Probst Nichlasen von Hertzogenpurch Verchaufft haben vnsers rechten purchrechts daz wir von Im ze purchrecht gehabt haben vnsern hof gelegen ze Aetzleinsperch in Rewdinkcher pharre vnd darzu sechtzig phenning geltes die der probst zu hertzogenburch dienet in den egenanten hof. vnd zwelif phenning geltes gelegen ze hasendorf auf einem garten vnd zwen phenning geltes Gelegen ze Aetzleinstorf (sic) auf einem garten. vnd ainen phenning geltes gelegen ze Egendorf auf ainem Akcher alles wienner munzz. vnd ain gantz lehen gelegen bei dem genanten hof. Vnd alles das das zu dem selben hof vnd zu dem lehen geho^eret vnd alles das daz wir daselbens gehabt haben in vrbar ze holtz ze velde vnd ze dorf. Es sei gestift oder vngestift versucht und vnuersucht wie so das genant ist da man von im allen alle iar dient dem Gotzhaus ze hertzogenpurch an einen phenning ein phunt wienner phenning ze purchrecht vnd nicht mer. Den vorgenanten hof mitsampt dem lehen vnd alles das das darzu geho^eret vnd alles das das wir ze Aetzleinsperich gehabt haben das purchrecht ist von dem egenanten Gotzhaus ze hertzogenburg als vor geschriben stet haben wir recht vnd redleich verchaufft vnd geben mit alle den nutzen vnd rechten als es vns an rechter tailung gegen vnsern pru^edern geualln ist vnd als wir es alles in purchrechts gewer her pracht haben, vmb siben vnd sybentzig phunt wienner phenning der wir gar vnd gentzleich gewert sein. Veyten dem Syrnekcher vnd seinen erben furbas ledichleich vnd freileich ze habn vnd allen irn frumen da mit ze schaffen verchauffen versetzen vnd geben wem si wellen an allen irresal. Vnd durich pezzer sicherhait so setzen wir vns ich fridreich, ich Ruger vnd ich Alollt die pru\eder die Olachter vnd vnser erben vnuerschaidenleich vber die egenanten Gu^eter alle ze rechten gewern vnd scherm fu^er alle ansprach als purchrechts recht ist vnd des Landes recht ze Osterreich. Wer aber das si furbas mit recht an den selben gu^etern icht chriegs oder ansprach gewunnen von wem das wer was si des schaden nement daz sulln wir In alles ausrichten vnd widerchern an alln irn schaden. Vnd sulln auch si das haben auf vns vnuerschaidenleich vnd auf allem vnserm gu^et das wir haben in dem Land ze Osterreich wir sein lebentich oder tode. Vnd daz diser chauf furbas also stet vnd vnzerbrochen beleib vnd daru^eber so geben wir In disen brif ze ainem warn vrchunde diser sache versigilten mit vnsern Insigiln vnd mit vnser pru^eder Insigiln Hainreichs vnd Seyfrids der Olachter vnd mit vnsers vetern Insigil Hainreichs des Olachter vnd mit hern Maricharts Insigil des Daffler die diser sache Gezeug sint mit irn Insigiln. Der brief ist geben nach Christes gepurde dreutzehen Hundert Iare. Darnach in dem vier vnd sechtzigistem Iare des nachsten phintztags vor sant Symons vnd sand Judas Tage.

Source Fulltext: FAIGL, Herzogenburg (Wien 1886) S. 246-247